மூலம்


பொதுப்பாயிரம் ஆசிரியர் ஆகாதவர் இலக்கணம்

31	மொழிகுண மின்மையு மிழிகுண வியல்பும் அழுக்கா றவாவஞ்ச மச்ச மாடலுங் கழற்குட மடற்பனை பருத்திக் குண்டிகை முடத்தெங் கொப்பென முரண்கொள் சிந்தையும் உடையோ ரிலரா சிரியரா குதலே.

ஆறுமுகநாவலர் காண்டிகையுரை

மொழி குணம் இன்மையும் - பாடம் சொல்லும் குணம் இல்லாமையையும் , இழிகுண இயல்பும் -இழிகுணம் ஆகிய இயற்கையையும் , அழுக்காறு - பிறருக்கு வரும் கல்வியைக் குறித்துக் கொள்ளும் பொறாமையையும் , அவா-பொருளின் மேல் அதிகமாக வைக்கும் ஆசையையும் , வஞ்சம் - மெய்ப் பொருளை மறைத்துப் பொய்ப் பொருளைக் காட்டி வஞ்சித்தலையும் , அச்சம் ஆடலும் - கேட்போருக்கு அச்சம் உண்டாகப் பேசுதலையும் , கழற்குடம் , மடல் பனை , பருத்திக் குண்டிகை , முடத்தெங்கு ஒப்புஎன - கழற் குடமும் மடல்பனையும் பருத்திக்குண்டிகையும் , முடத்தெங்கும் ஆகிய நான்கனையும் ஒப்பு என்று சொல்ல , முரண்கொள் சிந்தையும் உடையோர் - மாறுபாடு கொண்ட கருத்தையும் தம்மிடத்தில் உடைவர் , ஆசிரியர் ஆகுதல் இலர் - கற்பிக்கும் ஆசிரியர் ஆகுதல் இலர் ஆவர் .