பெயர்ச்சொல் வினைச்சொற்களும் ஆகாது , அவற்றின் வேறும் ஆகாது இடைநிகரனவாய் நிற்றலின் , இடைச் சொல் எனப்பட்டன, தனித்து நடத்தல் இன்றிப் பெயர் வினைகள் இடமாக நடத்தலின் , இடைச்சொல் எனப்பட்டன எனினும் அமையும் .

இசைநிறை என்பது வேறுபொருள் உணர்த்தாது செய்யுளில் ஒசையை நிறைத்து நிற்பது .

அசைநிலை என்பது வேறுபொருள் உணர்த்தாது பெயர்ச்சொல்லோடும் வினைச்சொல்லோடும் சார்த்திச் சொல்லப்பட்டு நிற்பது. [அசைத்தல் = சார்த்துதல்]

1. குழையன் என்புழிப் , பெயரின் அகத்து உறுப்பாய் விகுதி இடைச்சொல் ஒன்று வந்தது ,தச்சிச்சி , நிலத்தினன் என்புழிப் , பெயரின் அகத்து உறுப்பாய் முறையே இடைநிலையும் விகுதியும் , இடைநிலையும் சாரியையும் விகுதியுமாகிய இடைச்சொற்கள் பல வந்தன.

2. உண்ணாய் என்புழி வினையின் அகத்துறுப்பாய் விகுதி இடைச்சொல் ஒன்று வந்தது. நடந்தான் , நடந்தனன் என்புழி , வினையின் அகத்துறுப்பாய் முறையே இடைநிலையும் விகுதியும் , இடைநிலையும் சாரியையும் விகுதியுமாகிய இடைச்சொற்கள் பல வந்தன.

3. அதுமன் , கொன்னூர் என்புழிப் , பெயரின் புறத்து உறுப்பாய்ப் பின்னும் முன்னும் ஒன்று வந்தது. அது மற்றம்ம , இனி மற்றொன்று என்புழிப் , பெயரின் புறத்துறுப்பாய்ப் பின்னு முன்னும் பல வந்தன .

4. வந்தானோ , ஐயோ இறந்தான் என்புழி , வினையின் புறத்து உறுப்பாய்ப் பின்னும் முன்னும் ஒன்று வந்தது , கொன்றான் கூகூ , சீசீ போ என்புழி , வினையின் புறத்து உறுப்பாய்ப் பின்னும் முன்னும் பல வந்தன .