மூலம்


பொதுப்பாயிரம் மாணாக்கனது வரலாறு மாணாக்கர் ஆகாதவர் இலக்கணம்

39	களிமடி மானி காமி கள்வன் பிணிய னேழை பிணக்கன் சினத்தன் துயில்வோன் மந்தன் தொன்னூற் கஞ்சித் தடுமா றுளத்தன் தறுகணன் பாவி படிறனின் னோர்க்குப் பகரார் நூலே.

ஆறுமுகநாவலர் காண்டிகையுரை

களி - கள்ளுண்டு களிப்பவனும் , மடி-சோம்பேறியும் , மானி - அகங்காரம் உடையவனும் , காமி - காமமுடையவனும் , கள்வன்-திருடனும் , பிணியன் - நோயாளியும் , ஏழை - அறிவில்லாதவனும் , பிணக்கன் - மாறுபாடு உடையவனும் , சினத்தன் - கோபம் உடையவனும் , துயில்வோன்-மிகத் தூங்குவோனும் , மந்தன் - புத்தி நுட்பம் இல்லாதவனும் , தொன்னூற்கு அஞ்சித் தடுமாறு உளத்தன்- பழைய நூல்களைக் கண்டு அஞ்சித் தடுமாறும் உள்ளத்தை உடையவனும் , தறுகணன் - அஞ்சத்தக்கவைகளை அஞ்சாதவனும் , பாவி - பாவஞ் செய்வோனும் , படிறன் - பொய் பேசுவோனும் , இன்னோர்க்கு - ஆகிய இப்படிபட்ட குற்றத்தை உடையவருக்கு , நூல் பகரார் - நூலைச் சொல்லார் ஆசிரியர் .