:: TVU ::

New Page 1

150

இலக்கண விளக்கம் - பொருளதிகாரம்

தசாங்கத்திற்குச் சிறப்புவிதி

803. உற்ற தசாங்கத் தினைஒரு சீரான்

முற்ற உரைத்தல்; முறைபிரித்து இசைப்பின்

பிழையாம்; புணர்மொழிப் பெயர்ஈற் றின்தொகின்

வழுவா காஎன வகுத்தனர் புலவர்.

இது தசாங்கத்தினைப் புணர்க்கும் திறத்து ஆவது ஒரு சிறப்புக் கூறுகின்றது.

இ - ள்: பாட்டுடைத்தலைவற்குப் பொருந்திய தசாங்கத்தினை ஒரு
சீராலே முடிவுபெறப் பாடுவது இலக்கணமாம்; பிரித்து வேறு சொல் முடிபு
கொடுத்துக் கூறல் குற்றமாம்; பிரித்தவழிப் புணர்மொழிப் பெயர் இறுதிக்கண்
தொகைச்சொல் கொடுத்து நச்செழுத்து அகற்றிக் கூறின் குற்றமாகாது
என்றவாறு.

(43)

விளக்கம்

மலைமுதலிய பத்து அங்கங்களும் தனித்தோ அடையடுத்தோ
ஒரேசீராக அமைக்கப்பட்டமை சான்றோர் செய்யுட்களில் காணப்படும்.

‘புகலாகும் இன்பப் பொருப்பும்’	- மலை

‘தேர்இன்பம் நல்கும் திருநாடும்’	- நாடு

‘அல்லாது உயர்ந்த அணிநகரும்’	- நகர்

‘கூறி நடாத்தும் குரகதமும்’	- பரி

‘காய்ந்த சிவஞானக் கடாக்களிறும்’	- யானை

‘நார்அகத்துக் கட்டும் நறுந்தொடையும்’	- மாலை

‘வந்த நவநாத மணிமுரசும்’	- முரசு

‘ஆக்கி அசைத்தருளும் ஆணையும்	- ஆணை