1.  நுதலியது அறிதல் :

     சூத்திரத் தொடரை வெளிப்படையாக நோக்கின் பயன் இல்லதுபோலத்
தோன்றினும், அதற்கு ஏற்ற வகையால் கருதி உணரப்படும் பொருள்
இன்னது என்று கொள்ளவைத்தல்.

2. அதிகாரமுறைமை :

    முன்நின்ற நூற்பாவின் பொருள் பின்வரும் நூற்பாக்களுள்
ஒன்றனுக்கோ, பலவற்றிற்கோ தேவைப்பட்ட அளவு தொடர்பு
கொள்ளவைத்தல்.

3. தொகுத்துச் சுட்டல் :

     பின்னர் விரிக்கப்பட வேண்டியனவற்றை முதற்கண் தொகுத்துக் கூறல்.

4. வகுத்துமெய் நிறுத்தல் :

    தொகுத்துக்கூறிய செய்தியைப் பின்னர் விளக்கம் வேண்டிப்
பகுத்துக்கூறல்.

5. மொழிந்த பொருளோடு ஒன்ற அவ்வயின் மொழியாததனை
முட்டின்று முடித்தல்:

    சொல்லப்பட்ட செய்திகளை மனங்கொண்டு சொல்லப்படாத அவற்றின்
இனமாகியவற்றின் செய்திகளையும் கொள்ளவைத்தல்.

6. வாராததனான் வந்தது முடித்தல்:

    ஒரு நூற்பாவில் ஒரு பொருண்மைக்கு வேண்டும் இலக்கணம்
முழுதும் கூறப்படவில்லையாயினும் கூறப்படாததனையும் அந் நூற்பாவில்
அடக்கிக்கொள்ளுதல்.

7. வந்தது கொண்டு வாராதது உணர்த்தல்:

    பின் ஒரு நூற்பாவில் கூறப்பட்ட செய்தியைக்கொண்டு, முன்
கூறப்படாத செய்தி ஒன்றினை உட்கொள்ளுவித்தல்.