8. முந்து மொழிந்ததன் தலைதடுமாற்று:

    முன் ஒருகால் பின்பற்றிய முறையைவிடுத்து, வேறு ஒரு கால்
தலைதடுமாற்றமாக முறை மாற்றிக்கூறி அதனால் சில கருத்துக்கள்
பெறப்படவைத்தல்.

9. ஒப்பக் கூறல்:

    ஒரு சொல்லுக்குக் கூறும்விதி இரட்டுற மொழிதலான் இருசொல்லுக்கும்
அமையுமாறு கூறுதலும், ஒன்றன் இலக்கணத்தைப் பிறிதொன்றனோடு
மாட்டெறிதலும் போல்வன.

10. ஒருதலை அன்மை:

    ஓர் அதிகாரத்தில் கூறவேண்டிய இலக்கணத்தை வேறோர்
அதிகாரத்தில் கூறி, அக்கூறப்பட்டதனையே கூறப்பெறாத அதிகாரத்திற்கும்
கொள்ள வைத்தல்.

11. தன்கோட் கூறல்:

    சொல்லப்படாத செய்திகள் பல உளவாயினும் ஒருநூற்கண் ஆசிரியன்

தான் கூறக் கருதியவற்றையே கூறல்.

12. முறை பிறழாமை:

    காரணம் பற்றியோ பற்றாமலோ முதற்கண் சில பொருள்களை
ஒருமுறையாகக் கூறியபின், எக்காரணம் கொண்டும் அம்முறையை
மாற்றாமலேயே பின்னர் எடுத்து விதத்தல்.

13. பிறன் உடம்பட்டது தான்உடம்படுதல்:

    இயற்கையாக மனங்கொள்ளத்தக்க வாய்ப்பு இன்று ஆயினும்,
தொன்றுதொட்டு வந்த வழக்கு நெறியான் இது கொள்ளத்தக்க பொருள்
என்று கூறி விடுத்தல்.

14. இறந்தது காத்தல்:

    முன் நூற்பாவில் கூறிய பொருள்களுள் ஒன்றனைப் பின் வேறொரு
நூற்பாவான் நீக்குதல்.