மெய்ந்நிலை மயக்கின் ஆஅகுநவும் என்பது பொருள் மயக்காகிய பிரேளிகைச்
செய்யுட்கண் திணைமுதலாயின திரிந்து வருவனவும் என்றவாறு.

அவை,
                    ‘எழுதுவரிக் கோலத்தார் ஈவார்க்கு உரியார்
                    தொழுதிமைக் கண்ணணைந்த தோட்டார்- முழுதகலா
                    நாணின் செறிந்தார் நலங்கிள்ளி நாடோறும்
                    பேணற்கு அமைந்தார் பெரிது’
என்பது முதலாயினவாம். இச்செய்யுட்கண் புத்தகம் என்னும் பொருள்மேல்
திணைதிரிந்தவாறு காண்க. பிறவும் அன்ன.

பிரேளிகை எனினும் பிசி எனினும் ஒக்கும்.

மந்திரப் பொருள்வயின் ஆஅகுநவும் என்பது மந்திரத்தை உடைய தெய்வங்கள்
இடத்தே அதற்கு உரிய அல்லாத சொற்களாய் வருவனவும் என்றவாறு.

இதற்கு உதாரணம் மந்திரநூல் வல்லார்வாய்க் கேட்டு உணர்க.

அன்றி அனைத்தும் கடப்பாடு இலவே என்பது ஆகிய அவ்வனைத்தும்
வழங்கியவாறே கொள்வதல்லது இலக்கணத்தான் யாப்புறவு உடைய அல்ல என்றவாறு.