(இ-ள்) வெளிப்படை உவமமாவது தொழிலும் பயனும் வடிவும்
வண்ணமும் தம்மோடு உவமிக்கப்படும் பொருளோடு அடுத்து உள்ளத்தான்
உணர வேண்டாது சொல்லிய சொற்றொடரே பற்றுக்கோடாகத் தாமே
புலப்படநின்று விளங்குவதாம் என்றவாறு.

      அஃது அங்ஙனமாமாறு அணிஇயலுள் காண்க. ²¹⁵
 

விளக்கம்

     வெளிப்படை உவமமாவது உபமானமும் உபமேயமும்
வெளிப்படையாக இருப்பதாம். உவமஉருபும் பொதுத் தன்மையும்
வெளிப்படையாகவும் இருக்கலாம்; மறைந்தும் இருக்கலாம்.

     பால்போலும் இன்மொழி: பால்-உபமானம்; மொழி உபமேயம்;
போலும்- உவமஉருபு; இனிமை-பொதுத்தன்மை. பால் போலும் மொழி
என்ற தொடரில் பொதுத்தன்மை மறைந்துள்ளது.

    பால் இன்மொழி என்ற தொடரில் உவமஉருபு மறைந்துள்ளது.
பால்மொழி என்ற தொடரில் உவமஉருபும் பொதுத்தன்மையும்
மறைந்துள்ளன. இவையாவும் வெளிப்படை உவமமே.

    அணியியலில் பண்பு என்றதனை ஈண்டு இவர் மெய்உரு-எனத்
தொல்காப்பியர் கருத்துப்படி பிரித்துக் கூறியுள்ளார். மெய்-வடிவு; உரு-நிறம்.
இவ்விரண்டும் பண்பு என அணியியலுள் ஒன்றாக அடக்குவார்.
புலிப்பாய்ச்சல்-வினை; மழை வண்கை-பண்பு; துடிஇடை-மெய்; பொன்னிறம்-
உரு.

ஒத்த நூற்பாக்கள்

     ‘ஏனை உவமம் தான்உணர் வகைத்தே.’

தொல் பொ. 49

     முழுதும்--                                     ந. அ. 239

215