இதுவும் மேலதற்கு ஒருசார் எய்தியது ஓர் இயல்பு வகுத்துக் கூறுகின்றது.

     இ-ள் :   ஒரு வினையான் வரும் சிலேடையும், பல வினையான்
 வரும் சிலேடையும், மாறுபட்ட வினையான் வரும் சிலேடையும்,
 சிலேடித்தவற்றை நியமம் செய்யும் சிலேடையும், அந்நியமத்தை விலக்கும்
 சிலேடையும், முன்னர்ச் சிலேடித்தவற்றைப் பின்னர் விரோதிப்பச் சிலேடித்தலும்,
 முன்னர்ச் சிலேடித்தவற்றைப் பின்னரும் விரோதியாமல் சிலேடித்தலும்
 என ஏழு கூறுபாட்டானும் நடக்கும் அவ்வலங்காரம் என்றவாறு.