அலங்கார பஞ்சகம்

844. வெள்ளை கலித்துறை அகவல் விருத்தம்

    எள்ளலில் வண்ணம் இவைஓர் ஐந்தும்

    அலங்கார பஞ்சகம் ஆகும் என்ப.

இஃது அலங்கார பஞ்சகத்தின் இலக்கணம் கூறுகின்றது.

     இ - ள்: வெண்பாவும் கலித்துறையும் அகவலும் விருத்தமும் இகழ்தல் இல்லாச் சந்த விருத்தமும் ஆகிய இவை ஓரைந்தினையும் அந்தாதியாகப் பாடுதல் அலங்காரப் பஞ்சகம் என்று கூறுவர் ஆசிரியர் என்றவாறு.
        

  (84)

ஒத்த நூற்பாக்கள்

     ‘வெள்ளை, செறிந்த கலித்துறைசீர் மன்பா - அறைந்த

     கலங்காத மன்விருத்தம் காண்டகைய வண்ணம்

     அலங்கார பஞ்சகமென் றார்.’      

 - வெண். பாட். செ. 22

     ‘வெண்பா கலித்துறை வேறுஆசிரியம் விருத்தம் வண்ணம்

     பண்பால் வருப அலங்காரப் பஞ்சகம்.’           

 - நவ. 41

     ‘ஓதுவெள்ளை கலித்துறையா சிரிய வஞ்சி

          உறுவிருத்தம் வகுப்புஐந்தால் உரைக்கில் அம்ம

     கோதில்அலங் காரபஞ்ச கப்பேர்.’          

 - சித. பாட். 34

     ‘ஆதிப்பா கலித்துறை ஆசிரியம் வஞ்சி

     மனவிருத் தத்தோடு வண்ணம் இசைய

     ஐந்தின் அலங்காரத்து அந்தா தித்துப்

     பாடுவது அலங்கார பஞ்சகம் என்ப.’                

- பி. ம. 21

     ‘வெண்பா கலித்துறை அகவல் விருத்தம்

     அலங்கார பஞ்சகம் அந்நால் வகைப்பாக்

     கலந்த ஐந்தாய்க் கதிபெறப் பாடலே.’        

- தொ. வி. 282