ஒத்த நூற்பா

முழுதும் - தொல். பொ. 484. பே.        

 136

பத்துவகைக் குற்றங்கள்

897. ஈரைங் குற்றமும் நேரிதின் நாடின்

    கூறியது கூறல்¹ மாறுகொளக் கூறல்²

    குன்றக் கூறல்³ மிகைபடக் கூறல்⁴

    பொருளில மொழிதல்⁵ மயங்கக் கூறல்⁶

    கேட்போர்க்கு இன்னா யாப்பிற்று ஆதல்⁷

    பழித்த மொழியான் இழுக்கம் கூறல்⁸

    தன்னான் ஒருபொருள் கருதிக் கூறல்⁹

    என்ன வகையினும் மனங்கோள் இன்மை¹⁰

    அன்ன பிறவும் அவற்றுவிரி ஆகும்.

இஃது ஈரைங்குற்றமாவன இவை என்கின்றது.

     இ - ள்: பத்து வகைக் குற்றத்தினையும் நேர்மையான் ஆராயுமிடத்து
முன்னர்க் கூறிய பொருளைப் பின்னர்க் கூறுதலும், முன்னர்க் கூறியதற்குப்
பின்னர் மாறுபடக் கூறுதலும், குறைபாடுறக் கூறுதலும், ஒரு பொருட்கு
இலக்கணம் கூறுமிடத்துப் பொருட்குச் சிறப்பிலக்கணம் தோன்றக் கூறாது
ஏனைப் பொருட்கண்ணும் செல்லும் பொது இலக்கணத்தால் கூறுதலும்,
கூறும் பொருள் பெறாமல் கூறுதலும், தெளிவுறாமல் கவர்படுமொழியால்
மயங்கக் கூறுதலும், கேட்டோர்க்கு இன்னாப் பொருளாய்த் தொடர்ச்சி
இன்றிக் கூறுதலும், பழிப்புடைய சொல்லான் இழிபு தோன்றக் கூறுதலும்,
வரலாற்று முறைமையோடு படாது செய்வோன் தான் ஒரு பொருளைக்
கற்பித்துக் கூறுதலும், எவ்வகையானும் கேட்போர் மனங்கொள்ளாதிருக்கக்
கூறுதலும் இவை போல்வன பிறவுமாம் என்றவாறு.