யினை உடையதென்பது ; சமதை என்னும் உயிர், ஒத்திருந்த பதங்களை உடையது; சமாதி என்னும் உயிர், ஒன்றின் பக்கலுள்ளது ஒரு பண்பையே உலகுக்கு ஒத்திருக்கும் வண்ணம் அப்பண்பு குன்றியிருப்பதொன்றின்கண் உண்டாகப் புணர்ப்பது; சுகுமாரதையாவது, வல்லொற்று நீங்கியுள்ள சொற்களால் ஆக்கப்பட்டு மெல்லிதாயிருப்பது (எ-று.)

(8)

151. இதுவும் அது.

*ஆனா வழகினைக் காந்தியென் கின்ற ததுதமிழின்
நானா விதமாய் நடைபெற் றியலு நனிபுகட்சி
தானா மிடத்தினும் வார்த்தையின் கண்ணுந் தலைசிறந்து
தேனாய் விதர்ப்பருக் குங்கவு டர்க்குந் திறப்படுமே.

(இ-ள்.) காந்தி என்னுமலங்காரம் யாப்பு வனப்பெனக் கொள்க; அது தமிழிற் பல கூறுபாடு பெற்றுப் புகட்சியினும் வார்த்தையினும் உலகிறந்த நன்பொருட்பொலிவான் நின்று விதர்ப்பர்க்குங் கௌடர்க்கும் நெறிப்பட்டியலும் (எ-று.)

'ஒழிந்த அலங்காரங்களோ?' எனின், அவ்வப்பெயராலே தம்பொருள் விளங்கி இருக்கும் எனக் கொள்க.

வரலாறு:-

¹"பற்றுக பற்றற்றான் பற்றினை யப்பற்றைப்
பற்றுக பற்று விடற்கு."

இது சொற்செறிவுடைமையாற் சிலீட்டம் என்னும் உயிராயிற்று. இது சிலீட்டை எனவுமமையும்.

²"சுவையொளி யூறோசை நாற்றமென் றைந்தின்
வகைதெரிவான் கட்டே யுலகு."

1. திருக்குறள்,350. 2. திருக்குறள், 27.