மாறுகோ ளொருதலைதுணிவு, பிறநூற்குற்றங் காட்டல், பிறிதொடுபடாஅன் தன்மதம் வகுத்தல் என ஏழும் எனக்கொள்க.

தந்திர  வுரையாவன:-- சூத்திரந்தோற்றல், சொல் வகுத்தல், சொற்பொரு ளுணர்த்தல், வினாதல், விடுத்தல், விசேடங் காட்டல், உதாரணங்காட்டல், ஆசிரிய வசனங் காட்டல், அதிகார வசனங் காட்டல், தொகுத்து முடித்தல், விரித்துக் காட்டல், துணிவு கூறல், பயனொடு புணர்த்தல், கருத்துரைத்தல் எனப் பதினான்கு என்ப.
இவற்றுட் சில வருமாறு:--

¹'நல்லா றெனினுங் கொளறீது மேலுலக
மில்லெனினு மீதலே நன்று.'
இஃது இரட்டுற மொழிதல்.

²'இலர்பல ராகிய காரண நோற்பார்
சிலர்பலர் நோலா தவர்.'
இது ஏதுவின் முடித்தல்.

³'தன்னுயிர் நீப்பினுஞ் செய்யற்க தான்பிறி
தின்னுயிர் நீக்கும் வினை.'
இது மறுத்தல்.

⁴'அருட்செல்வஞ் செல்வத்துட் செல்வம் பொருட்செல்வம்
பூரியார் கண்ணு முள.'
இஃது இன்னதல்லதிதுவென மொழிதல்.

⁵' மிகினுங் குறையினு நோய்செய்யு நூலோர்
வளிமுதலா வெண்ணிய மூன்று.'
இது மாட்டெறிந்தொழுகல்.

⁶'பிரிவுரைக்கும் வன்கண்ண ராகி லரிதவர்
நல்குவ ரென்னு நசை.'
இது எதிர்மறுத்தல்.

⁷'அறவினை யாதெனிற் கொல்லாமை கோறல்
பிறவினை யெல்லாந் தரும்.'
இது தொகுத்துக் காட்டல்.

⁸'நன்றி மறப்பது நன்றன்று நன்றல்ல
தன்றே மறப்பது நன்று.'
இது விளங்கச் சொல்லுதல்.