3. இகர ஈறு

இனி, அணி என்னும் பெயர்கள்

259. இனியணி யிகரச் சுட்டுமொற் றிடைமிகும்.

(இ-ள்.) இனியென்னும் பெயரும், அணியென்னும் பெயரும், இகரச்சுட்டுப் பெயரும்
ஒற்றிடைமிக்கு முடியும்.

(வ-று.) இனிக்கொண்டான் அணிக்கொண்டான், இக்கொற்றன் (100)

இன்றி, அன்றி என்னும் சொற்கள்

260. யாப்பினு ளின்றியு மன்றியு முகரம்
     ஆய்வரின் மிகாதியல் பாமென மொழிப.

(இ-ள்.) செய்யுட்கண் இன்றி, அன்றியென்னுங் குறிப்பு வினையெச்சமொழிகள்
உகரமாகத் திரிந்துவரின் மிகாதியல்பாமென்க.

(வ-று.) ‘நாளன்றுபோகி’ (புறம் - 144) உப்பின்று புற்கையுண்கமா கொற்கையோனே.

(வி-ரை.)

‘‘அன்றி யின்றியென் வினையெஞ் சிகரம்
தொடர்பினுள் உகர மாய்வரின் இயல்பே’’ (உயிரீற்-23)

என்பது நன்னூல். (101)

தூணி என்னும் பெயர்

261. பதக்கு வரின்மிகுந் தூணிக் கிளவி.

(இ-ள்.) தூணியென்னு முகத்தலளவைப் பெயருக்குமுன் பதக்கென்னு முகத்தலளவைப்
பெயர்வரி னொற்றிடை மிக்குமுடியு மென்க.

(வ-று.) தூணிப்பதக்கு. (102)

நாழி என்னும் பெயர்

262. உரிவரி னாழியி னீற்றுயிர் மெய்கெட
      மருவும் டகரமாம் வல்லினப் புள்ளி.