(இ-ள்.) நெல், செல், கொல், சொல் நான்கு மொழியும் அல்வழிக்கண்ணும் றகரமாகத்
திரியும்.

(வ-று.) நெற்காய்ந்தது, செற்கடிது, கொற்கடிது, சொற்கடிய. (196)

இல் என்னும் சொல்

356. இன்மை யுணர்த்து மில்லென் கிளவிக்
     கைகாரம் வரும்வழி யியல்பொடு மிகலும்
     ஆகாரம் வரும்வழி மிகலுமாம் வேற்றுமை.

(இ-ள்.) வேற்றுமைக்க ணில்லாமையை யுணர்த்தும் இல்லென்னுஞ் சொல்
ஐகாரச்சாரியை பெறுங்கால் இயல்பாதலு மிகுதலு மாகாரச் சாரியை பெறுங்கால்
மிகுதலுமாமென்க.

(வ-று.) இல்லைபொருள்; இல்லைப்பொருள்; இல்லாப்பொருள். (197)

வல்

357. வல்லுக ரத்தொடு வருமென மொழிப.

(இ-ள்.) வல்லென்னுஞ் சூதாடு கருவிப்பெயர் உகரச்சாரியை பெறுமென்க.

(வ-று.) வல்லுக்கடிது. (198)

வல் என்பதன் முன் பலகையும் நாயும்

358. பலகையு நாயும் வரூஉங் காலை
     அகரச் சாரியை யடையு மென்ப.

(இ-ள்.) வல்லென்னும் மொழிக்குமுன், பலகையென்னும் பெயரும், நாயென்னும்
பெயரும் வந்துபுணரின் அகரச் சாரியை பெறும்.

(வ-று.) வல்லப்பலகை, வல்லநாய். (199)

ஆலும் வேலும்

359. ஆலும் வேலு மம்மொடு சிவணும்.

(இ-ள்.) மரப்பெயராகிய ஆலென்னு மொழியும் வேலென்னு மொழியும் அம்முச்
சாரியை பெறும்.