கோப்பெருஞ் சோழன். (பி-ம்.) 1. ‘ரெமமுறு’, ‘ரேமமுறு’; 4. ‘பகுவெண்’; 5. ‘விளங்குந் திருநுதல்’.
(ப-ரை.) எலுவ- எம் நண்ப, சிறாஅர் ஏமுறு நண்ப - இளைஞர் இன்புறுதற்குக் காரணமாகிய நட்பையுடையோய், புலவர் தோழ - அறிவுடையாருக்குத் தோழ, கேளாய் - கேட்பாயாக: மா கடல் நடுவண் -பெரிய கடலின் நடுவில், எண்ணாள் பக்கத்து பசு வெண் திங்கள் - எட்டாந் திதிக்குரிய இளைய வெள்ளிய திங்கள், தோன்றி யாங்கு - தோன்றியதைப் போல, கதுப்புஅயல் விளங்கும் சிறுநுதல்--ஒரு மகளின் கூந்தலுக்கு அயலில் விளங்குகின்ற சிறிய நெற்றி, புது கோள் யானையின் - புதிதாகப் பிடிக்கப்பட்ட யானையைப் போல, எம் பிணித்தற்று - எம்மைப் பிணித்தது.
(முடிபு) எலுவ, நண்ப, தோழ, கேளாய்: சிறுநுதல் எம்மைப் பிணித்தற்று.
(கருத்து) ஓர் அழகிய மகள் என் நெஞ்சத்தைக் கவர்ந்தாள்.
(வி-ரை.) எலுவ வென்றது தனக்குத் தோழமையுடைமையைச் சுட்டியது. தான் தலைவியைப் பாங்கனது உதவியினாற் கண்டு இன்புற லாகுமென்று எண்ணியவனாதலின், ஏமுறு நண்பவென்றான்; ஏமம் ஏமென்றாயிற்று (முருகு. 97, ந.) அறிவுரையைக் கூறுதல் அவன் கடமை யென்பதைப் புலப்படுத்திப் புலவர் தோழ வென்றான்; சிறுவர் நண்ப வென்றதனால் இழுக்கு நேராதவாறு புலவர் தோழவென்று சிறப்பித்தான்.
எண்ணாட்பக்கம் - எட்டாவது திதி; அட்டமி. பசுமை - இளமை. கூந்தலுக்குக் கடலும் நுதலுக்குத் திங்களும் உவமைகள். கதுப்பயல் விளங்கும் சிறுநுதலென்றது அளகமாகிய முன்னுச்சி மயிருக்கு அருகில் விளங்கும் நெற்றியென்றபடி; இது பற்றியே, “அளகவாணுதல்” (கம்ப. ஊர்தேடு. 53) என்பது போன்ற வழக்குகள் உண்டாயின; குறுந்.34, வி-ரை.
புதுக்கோள் யானை - புதியதாகக் காட்டிலிருந்து பிடிபட்ட யானை; தலைவன் தான் முன்னர் இத்தகைய உள்ளக்கவர்ச்சியை அடைந்தவனல்ல னாதலின் புதுக்கோள் யானையை உவமை கூறினான். பிணித்தற்று பிணித் தன்றென்பதன் விகாரம்; பிணித்தல் - இங்கே உள்ளத்தைப் பிணித்தல்.
அத்தை, ஏ: அசைநிலை.
மேற்கோளாட்சி 1. ரகார வீற்று உயர்திணைப் பெயர் விளிவேற்றுமைக்கண் அளபெடுத்தது (நன். 308, மயிலை.) (‘சிறாஅர்’ என்பதை மயிலைநாதர் விளியாகக்கொண்டார் போலும்.)
1-2. னகாரவீற்று உயர்திணைப் பெயர் அண்மை விளிக்கண் ஈறு அழிந்தது (நன். 306, மயிலை, 307, சங்..)
3-5. ‘கடல் போன்றது கூந்தலெனவும், கடல் நடுவெழுந்த எண்ணாட் பக்கத்து மதி போன்றது நுதலெனவும் கூறினான்; அதனால், கடல் போலு மயிரென்றதும், பல காவதப் பரப்புடைய மதிபோன்றது நுதலென்றதும் கழியப் பெரியவாயினும், அது வழக்காதலிற் சிறப்பிற்றீராது மனங்கொள வந்த உவமம் எனவே படும்’ (தொல். உவம. 10, பேர்); எண்ணாட்டிங்கள் மகளிர்நெற்றிக்கு உவமை (சிலப். 2: 38-40, அடியார்); குழவிப் பருவத்து ஒரு கலையுடைத்தாய்ப் பின்பு இளமைப் பருவத்தே நின்ற பிறை, மகளிர் நெற்றிக்கு உவமை (சீவக. 165, ந..)
மு. தலைவன் பாங்கற்கு உற்ற துரைத்தது (இறை. 3; தொல். களவு. 11, இளம், ந; நம்பி. 137); பாங்கன் கேட்பத் தலைவன் கூறியது (தொல். செய். 196, பேர், ந.); பாங்கற் கூட்டம் (தொல். செய். 198, பேர், 201, ந.); தலைவன் பாங்கனை எலுவவென்று விளித்தது (தொல். பொருளியல், 26, ந..)
ஒப்புமைப் பகுதி 2. அத்தை: குறுந். 389:2.
4. பசு வெண்டிங்கள்: குறுந். 359:2; “பசுவெண் ணிலவு” (நற். 196:2.)
3-5. நுதலுக்குப் பிறை: குறுந். 226:2-3.
6. புதுக்கோள் யானை: மணி 12:45, 18:168; பெருங். 1. 33:79.
தலைவனுக்கு யானை: குறுந். 359:4; கலி.2:26-9; மணி. 18:160-68.
5-6. தலைவியின் நுதல் தலைவன் உள்ளத்தைக் கவர்தல்: “ஒண்ணுதற் கோஒ வுடைந்ததே ஞாட்பினுள், நண்ணாரு முட்குமென்பீடு” (குறள், 1088.)
(129)