மதுரை ஆசிரியன் கோடங்கொற்றன் (பி-ம். மதுரை நூலாசிரியன், மதுரைப்பாலாசிரியன்.) (பி-ம்.) 1. ‘கழியா’, ‘கழியிற்’; 4. ‘இல்வழி’; 5.’பரல்பாற்’, ‘பால்பரற்’, ’பரலலாற்’; 6. ‘சேண்மழை’; 7. ‘மலைநாடே’.
(ப-ரை.) கழிய காவி குற்றும் - கழியினிடத்து மலர்ந்த காவிமலர்களைப் பறித்தும், கடல வெள்தலை புணரி ஆடியும் - கடலிலுள்ள வெள்ளிய தலையையுடைய அலையின்கண் விளையாடியும், நன்று - மிக, பிரிவு இல் ஆயம் - தன்னோடு என்றும் பிரிதலில்லாத ஆயத்தார், உரியது ஒன்று அயர - தத்தமக்கு உரிய விளையாட்டைப் புரிய, இ வழி படுதலும் ஒல்லாள் - இவ்விடத்துப் பொருந்துதலுக்கும் உடம்படாளாகி, செல் மழை தவழும் சென்னி - விரைந்து செல்லும் மேகங்கள் தவழ்கின்ற உச்சியையுடைய. விண் உயர் பிறங்கல் - வானத்தளவும் உயர்ந்த விளக்கத்தையுடைய, விலங்குமலை நாட்டு - குறுக்கிடும் மலைகளையுடைய நாட்டில், அ வழி - அப்பாலை நிலத்தில், பரல் பாழ் படுப்ப - பருக்கைக்கற்கள் தன் அடியின் அழகைச் சிதைக்கும் வண்ணம், சென்றனள் - தலைவி போயினள்.
(முடிபு) ஆயம் அயர இவ்வழிப்படுதலும் ஒல்லாள்; விலங்கு மலைநாட்டில் அவ்வழிச் சென்றனள்.
(கருத்து) தலைவி நம்மைப் பிரிந்து தலைவனுடன் சென்றனள்.
(வி-ரை.) பிரிவில் ஆயமென்றாள் அதனையும் பிரிந்தனளென்று நினைந்து. உரியதொன்று அயர - தலைவிக்கு உரியதொரு செயலைப் புரிய என்றலுமாம்.
பால் பரற்படுப்ப என்ற பாடத்திற்கு ஊழ்வினை தன்னைப் பாலை நிலத்துப் பருக்கைக் கற்களினிடையே செல்லும்படி செய்யவென்று பொருள்கொள்க. மாது, ஓ: அசை நிலைகள்.
செல் மழை - இடியையுடைய மேகமெனலும் ஒன்று. விண்ணளவும் உயர்ந்ததாகலின், விரைவாகச் செல்லும் மேகம் அம்மலையினால் தடையுற்றுத் தவழ்ந்தேறியது. பிறங்கல் - விளக்கம்; (பிறங்கு கல், பிறங்கலென விகாரம்; வழியுயர்ச்சியுமாம்’ (8:13, உரை) என்பர் அகநானூற்றுரை யாசிரியர்.
பரல் பாழ்படுப்பச் சென்றனளென்றது தலைவியின் மென்மைத் தன்மைக்கு இரங்கியவாறு.
ஒப்புமைப் பகுதி 1. கழிப்பூக் குறுதல்: “கழிப்பூக் குற்றும்” (அகநா. 330:1.)
மகளிர் பூக்குறுதல்: குறுந். 142:1, ஒப்பு.
2. மகளிர் கடலாடுதல்: “வெண்டலைப் புணரி யாயமொடாடி”, “தொடலை யாயமொடு கடலுட னாடியும்”, “திரையுழந் தசைஇய நிரைவளை யாயம்” (அகநா.20:8, 110:6, 190:1.)
வெண்டலைப் புணரி: அகநா.20:8; புறநா.2:10, 55:18.
5. பரல் பாழ்படுத்தல்: “பரற்பகை யுழந்த நோயொடு சிவணி” (பொருந.44.); “பாத்தி யன்ன குடுமிக் கூர்ங்கல், விரனுதி சிதைக்கு நிரைநிலை யதர, பரன்முரம் பாகிய பயமில் கானம்” (அகநா. 5:13-5); “பரல்வடுப் பொறிப்ப” (பெருங். 2:9:162.)
6. விண்ணுயர் பிறங்கல் மலை: “வானுயர் பிறங்கன்மலை” (குறுந். 285:8.)
விலங்கு மலை நாடு: குறுந். 134:7.
(144)