கொல்லனழிசி. (பி-ம்.) 1.’சிறுகுடிக்’;4.’துறைநரொடு சார்வாத்’.
(ப-ரை.)இ துறைகெழு சிறுகுடி - கடற்றுறை பொருந்திய இந்தச் சிற்றூர், கானல் அம் சேர்ப்பன் - கடற்கரைச் சோலையையுடைய சேர்ப்பனது, கொடுமை எற்றி - கொடுமையை நினைந்து, ஆனா துயரமொடு - மிகுகின்ற துன்பத்தோடு, வருந்தி - துயரமுற்று, பானாள் - நடுயாமத்தில், துஞ்சாது உறைநரொடு - துயிலாமல் தங்குவாரை, உசாவா - ஏனென்று வினாவாத, துயில்கண் மாக்களொடு - துயிலுதல் பொருந்திய கண்களையுடைய அறிவற்ற மக்களோடு, நெடு இரா உடைத்து - நெடிய இரவை உடையது, ஆதலின், உறைபதி அன்று - இது நாம் தங்கியிருத்தற்குரிய ஊர் அன்று.
(முடிபு) இச்சிறுகுடி துயிற்கண் மாக்களொடு நெட்டிராவுடைத்து; உறைபதியன்று.
(கருத்து) தலைவர் இல்லாமையால் இவ்வூர் நமக்கு இனி உறையும்பதி அன்று.
(வி-ரை.) “புல்வேய் குரம்பை, ஊரென வுணராச் சிறுமை” (அகநா. 200: 2-3) யுடைத்தாதலின், சிறுகுடியென்றாள். கொடுமை - பிரிவின் கண் நீட்டித்தல்; (குறள்.1169, பரிமேல்.) எற்றி - நினைந்து (தொல். உரி.39.) துஞ்சாதுறைநரென்று தலைவி தன்னையே பிறர் போலக் கூறினாள்; (குறள்,1154, பரிமேல்.) உறைநரொடு : உருபு மயக்கம். உசாவாவென்றது உசாவித் தன் துயர் நீங்குதற்கு ஆவனவற்றைச் செய்யாத என்பதாம். தோழி மறை வெளிப்படுத்துக் கொண்டு மேல் அறத்தொடு நிற்றற் பொருட்டுத் தலைவி கூறுவன கேட்டற்குப் பொய்த்துயில் கொள்வா ளாதலின் ‘துயிற்கண்மாக்கள்’ என்றாள். மாக்களென்றது இங்கே தோழியை; தன் ஆற்றாமை அறியும் வன்மையில்லாமை பற்றி இங்ஙனம் கூறினாள். கணவனைப் பிரிந்தவர்க்கு இராப்பொழுது பண்டையினெடியதாகத் தோற்றுதல் இயல்பாதலின் நெட்டிரா வென்றாள்; “ஊழியிற் பெரிதா னாழிகை யென்னும்” (திவ். பெரிய திரு. 2. 7:4.) ஏகாரம் : அசை நிலை.
மேற்கோளாட்சி 2. எற்று என்னும் சொல் நினைவென்னும் பொருளில் வரும் (தொல். உரி. 41.சே, தெய்வச், 39, ந; இ.வி.282.)
மு. தலைவனோடு தன்திறத்து ஒருவரும் ஒன்று உரையாத வழித் தனது ஆற்றாமையால் தன்னோடும் அவனோடும் பட்டன சில மாற்றம் தலைவி தானே கூறுதலும் உள (தொல். களவு. 20, ந.)
ஒப்புமைப் பகுதி 2. தலைவன் கொடுமை:குறுந். 9:7, ஒப்பு; அகநா.398:7:குறள்,1169.
3.தலைவி துஞ்சாமை: குறுந். 6:4,ஒப்பு.
5. மாக்கள்:குறுந். 6:2, ஒப்பு.
நெட்டிரா: “கொடியார் கொடுமையிற் றாங்கொடிய விந்நாள், நெடிய கழியு மிரா” (குறள்,1169.)
4-5. தலைவி துஞ்சாமையும் பிறர் துயிலலும்:குறுந்.6: 1-2, ஒப்பு.
(145)