துறை - செந்துறைப் பாடாண்பாட்டு. வண்ணமும் தூக்கும் அது.
பெயர் - தசும்புதுளங்கிருக்கை (11)

     (ப - ரை) 2-3. கயம் மூழ்கிச் சிரல் பெயர்ந்தன்ன நெடுவெள்ளூசி
யென்றது கயத்திலே மூழ்கிச் சிரல் எழுகின்ற காலத்து அதன் வாயலகை
ஒக்கப் புண்களை ¹இழைகொள்கின்ற காலத்து அப்புண்ணின் உதிரத்திலே
மறைந்தெழுகின்ற ஊசியென்றவாறு.

     4, நெடுவசியென்றது அவ்வூசித்தழும்பினை. வடுவென்றது அப்புண்ணின்
வடுவினை.

     இனி நெடுவள்ளூசியை நெட்டையென்பதோர் கருவியென்பாருமுளர்.

     5. அம்பென்றது அம்பாலாகிய தழும்பினை.

     5-6. அம்பு சேர் உடம்பினர்ச் சேர்ந்தோரல்லது தும்பை சூடாது
மலைந்த மாட்சியென்றது அரசன்வீரரில் அம்புசேருடம்பினராய்த் தம்மோடு
வீரமொத்தாரோடல்லாது போர்குறித்தார் தம்மொடு தும்பை சூடாமல்
மாறுபட்ட மாட்சிமையுடைய வென்றவாறு.

     10-11. இஞ்சிவீ விராய பைந்தார் பூட்டிச் சாந்து புறத்து எறிந்த என்றது
மதுநுகர்வழி இடையிடைக் கறித்து இன்புறுதற் பொருட்டு இஞ்சியும். மோந்து
இன்புறுதற்பொருட்டு பூவுமாக விரவித் தொடுத்த மாலையினைப் பூட்டி
²அவ்வாறு பயன்கோடற்குச் சாந்தும் புறத்தெறிந்தவென்றவாறு.

     11. தசும்புதுளங்கிருக்கையென்றது தன் களிப்புமிகுதியால் தன்னை
யுண்டாருடல்போல ³அத்தசும்பிருந்து ஆடும்படியான இருப்பென்றவாறு.

     இச்சிறப்பான் இதற்கு, 'தசும்புதுளங்கிருக்கை' என்று பெயராயிற்று.

     12. சேறு - சுவை. 12 - 3. வண்மகிழ்மட்டத்தை ஓம்பாவீகையிற்
சுரந்தென மாறிக் கூட்டுக.

     இனி மணிநிறமட்டத்தினையும் ஓம்பாவீகையினது வளவிய
மகிழ்ச்சியினையும் சுரந்தென இரண்டாக உரைத்தலுமாம்.

     மன்னரேத்தக் (19) களிறூர்ந்து (18) என முடித்து அதனைக்
களிறூரவெனத் திரித்து மூய (20) என்னும் வினையொடு முடிக்க.

     ¹இழை கொள்ளல் - நூலால் தைத்தல்.

     ²அவ்வாறு பயன் கோடலாவது கள்ளின் நாற்றத்தை மாற்ற மோந்து
இன்புறுதல்.

     ³'களிப்பு மிகுதியால் அசையும் மிடாவினின்றும் வார்த்த பசிய
முளையாலாக்கின கட்டெளிவை' (மலைபடு. 463, ந.)