(பி - ம்.) 1 ‘எற்கீத்து’ 2 ‘யியற்றேர்’5 ‘குடடினிதுனறுமநதனனே’ 7 ‘உறைப்பெயலோலை’ 8 ‘மறைவல......கரந்தை’

திணை - கரந்தை; துறை - குடிநிலையுரைத்தல்.

ஒளவையார்.

(கு - ரை.) 1. “ஈயென் கிளவி யிழிந்தோன் கூற்றே” என்னுஞ் சூத்திர வுரையில் இவ்வடியை மேற்கோளாகக் காட்டி, ‘இவனென்பது முன்னிலையும் படர்க்கையுமென்று உணர்க’ என்பர் நச்சினார்க்கினியர்; தொல். எச்ச. சூ. 49.

2. களிற்றியானை - ஆண்யானை. இயல் தேர் - செல்லுகின்ற தேர். குருசில் : விளி.

3. நுந்தை தந்தைக்கு - நின் பாட்டனுக்கு.

4. எடுத்தெறி ஞாட்பு - படைக்கலங்களை எடுத்தெறியும் போரில். இமையான் - கண்ணிமையானாய்; “விழித்தகண் வேல்கொண்டெறிய வழித்திமைப்பின், ஓட்டன்றோ வன்க ணவர்க்கு” (குறள், 775)

5. குறட்டின் - உருளையின் குடம்போல; புறநா. 283 : 8.

6. மறப்புகழ் - வீரத்தால் வரும் கீர்த்தி; “மறம்வீங்கு பல்புகழ்” (பதிற். 12 : 8)

7. உறைப்புழி ஓலைபோல - மழை பெய்யுமிடத்து அம்மழைத்துளிகள் மேலே வீழாதபடி காக்கும் குடையைப்போல; ஓலை - தாழை; தென்னை, பனை இவற்றின் மடல்;இங்கே குடைக்கு ஆகுபெயர்.

‘உழி’ என்பது இடப்பொருளுருபாய் வருதற்கு இவ்வடி மேற்கோள்;நன். சூ. 301, மயிலை.; நன். வி. சூ. 302.

6 - 8. இவன் மறைக்குவன் - இவன் வேல் உன்மீது படாதபடி தடுத்தற்கு முயலுவான்; இதனை, “இலக்கு வற்குமுன் வீடணன் புகுமிரு வரையும், விலக்கி யங்கதன் மேற்செலு மவனையும் விலக்கிக், கலக்கும் வானரக் காவல னநுமன்முன் கடுக, அலக்க ணன்னதை யின்னதென் றுரைசெய லாமே” (கம்ப. வேலேற்று. 31)என்பதனாலும் உணர்க.

7 - 8. குடும்பத்தைக் குற்றமறைப்பானென்னும் இடத்துத் தன் குடியைத் துன்பமுறாமற் காக்க முயல்வானென்று பொருள்கூறி, ‘உறைப்புழி.........வேலே என்புழியும் மறைத்தல் இப்பொருட்டாயிற்று’ என்பர் பரிமேலழகர்; குறள், 1029.

மு. “முந்தை முதல்வர் துடிய ரிவன்முதல்வர், எந்தைக்குத் தந்தை யிவனெனக்கு - வந்த, குடியொடு கோடா மரபினோற் கின்னும், வடியுறு தீந்தேறல் வாக்கு” (பு. வெ. 19) என்பதை இச்செய்யுள் நினைப்பிக்கின்றது.

இது, தார்நிலையின்பாற்படுமென்பர்; தொல். புறத்திணை. சூ. 17, ந.