(பி - ம்.) 9 ‘குரூஉக்களிற்றுக்’

திணையும் துறையும் அவை.

அதியமான் நெடுமானஞ்சியை அவர் பாடியது.

(இ - ள்.) போரைச்செய்தற்குப் புடைபெயர்ந்து உலாவி விரும்பி உறைகழித்த வாள்கள்தாம், பகைத்தவரது காவலையுடைய அரணை யழித்தலால் அவர்தசையின்கண்ணே உறக்குளித்துக் ¹கதுவாய்போய் வடிவிழந்தன; அவன் வேல்கள்தாம், குறும்பர்சேர்ந்த அரண்களை வென்று அப்பகைவரது நறிய மதுவையுடைய நாட்டையழித்தலாற் சுரையோடு பொருந்திய கரிய காம்புடனே ஆணிகலங்கி நிலைகெட்டன; அவன்களிறுதாம், கணையமரத்தால் தடுக்கப்பட்ட கதவைப்பொருது அப்பகைவரது திரண்ட களிற்றையுடைய அரணையழித்தலாற் பரிய பிணித்தலையுடையவாகிய கிம்புரிகள் கழன்றன; அவன்குதிரைதாம், பரந்துவந்து ஒக்கப் பொருத வீரரது பொன்னாற் செய்யப்பட்ட பசிய மாலையையுடைய மார்பு உருவழிய ஓடுதலாற் போர்க்களத்தின்கட் பொருது வருந்திய குருதியான் மறுப்பட்ட குளம்பையுடையவாயின; அவன்தானும், நிலவகலத்தைத் தன்னுள்ளே யடக்கும் கடல்போன்ற படையுடனே பொன்னானியன்ற தும்பைக் கண்ணியையுடைய, கழல்வடிவாகவும் கிண்ணிவடிவாகவும் செய்து செறிக்கப்பட்டு அம்புபடுதலால் துளைபட்ட பரிசையையுடையன்; அவ்விடத்து அவனால் வெகுளப்பட்டோர் பிழைத்தல் எங்கேயுள்ளது? ²பெரியதாளினையும் ஒன்றோடொன்று தெற்றிக்கிடக்கின்ற கதிரினையுமுடைத்தாகிய நெல்லினையுடைய தலைமை பொருந்திய பழையவூர் நுங்கட்கு உரித்தாக வேண்டுவிராயிற் போய் அவனுக்குத் திறைகொடுத்தல் வேண்டும்; கொடீராயின், அதற்கு உடம்படுவானல்லன் வெல்லும் பூசலையுடையானென்று யான்சொல்லவும் தெளியீராயின், நுமக்கு, மெல்லிய தன்மையையும் கழன்மணியினது கனியால் கூறுபடுத்துச் சுருட்டப்பட்ட இனமாகிய சிலவாகிய பனிச்சையையும் குறிய வளையையுமுடைய உரிமைமகளிரது தோளைப் பிரிந்துறைதல் வியப்பன்று; அதனை யறிந்து போர்செய்ம்மின்-எ - று.

அறிந்தாடுமினென்ற கருத்து, அறியிற் போர்செய்தல் அரிதென்பதாம். குறும்பு - சிற்றரண்.

கடற்றானையினையும், பொலந்தும்பையினையுமுடைய அவன்றானு மென்க.

(கு - ரை.) 4. குறும்பு - அரண் ; அதிலுள்ளவர்க்கானமையின் ஆகுபெயர்.

4 - 7. "மடையமை திண்சுரை மாக்காழ்வேல்", "மாக்காழ் நெடுவேல்" (அகநா. 119, 369); "காழ்மண் டெஃகம்" (மதுரைக். 739; மலைபடு. 129)

6. சுரை - உட்டுளையையுடைய இரும்பு.

8 - 9. புறநா. 3 : 9 - 11, 4 : 10 - 11.

ழகரஉகரவீற்றுச்சொற்கள் நீண்டு உகரம் பெறுதற்கு மேற்கோள்; தொல். உயிர்மயங்கு. சூ. 59, ந; இ - வி.சூ. 95, உரை.

8 - 10. "கடிமதிற் கதவம் பாய்தலிற் றொடிபிளந்து, நுதிமுக மழுகிய மண்ணை வெண்கோட்டுச் சிறுகண் யானை", "பெருங்கதவு பொருத யானை மருப்பின், இரும்புசெய் தொடியி னேர வாகி", "அடுகளம் பாய்ந்த
தொடிசிதை மருப்பிற், பிடிமிடை களிற்றிற்றோன்றும்" (அகநா. 24 : 11 - 3, 26 : 6 - 7. 99 : 12 - 3)

11 - 3. புறநா. 98 : 5 - 7.

12. தார் - மார்பு; ஆகுபெயர்.

14. "நிலந்திரைத்தானை" (சிலப். 26 : 187); "நிலந்திரைப் பன்ன தானையோய் நினக்கே" (பதிற். விட்டுப் போன பகுதி, 1 : 10)

15. புறத்திணைமாலை பொன்னாற் செய்யப்படல் : புறநா. 22 : 20.

16.புறநா. 4 : 5.

17. "கடுந்தே றுறுகிளை மொசிந்தன துஞ்சும், செழுங்கூடு கிளைத்த
விளந்துணை மகாரின், அலந்தனர் பெருமநின் னுடற்றி யோரே" (பதிற். 71 : 6 - 8)

18 - 20. புறநா. 51 : 6 - 7. பிணிக்கதிர் - பிணித்தலையுடைய கதிர். செம்மல் - தலைமை. திறை - கப்பம்.

(97)

1. கதுவாய்போய் - வடுமிக்கு (பெருங். 1. 35 : 166, குறிப்புரை); "அரக்கன் கதுவாய்த் தலைகள்பத் தலறியிடக் கண்டான்", "கதுவாய்த் தலையிற் பலிநீகொள்ளக் கண்டாலடியார் கவலாரோ" (தேவாரம்)

2. தடவென்பதற்கு வளைவெனப் பொருள்கொண்டு, கதிர்க்கனத்தாலே வளைந்த தாளெனலுமாம்; "முடந்தைநெல்" (பதிற், 26; 3, 32 : 13)