திணையும் துறையும் அவை.

அவன்மகளிரைப் பார்ப்பார்ப்படுக்கக் கொண்டுபோவான் பறம்பு விடுத்த கபிலர் பாடியது.

(இ - ள்.) மது இருந்த சாடியை வாய்திறப்பவும் ஆட்டுக்கிடாயை வீழ்ப்பவும் அடப்பட்டு அமைந்தொழியாத கொழுவிய துவையையும் ஊனையுடைய சோற்றையும் விரும்பிய பரிசே தரும் மிக்க செல்வம் முதிர்ந்து எம்மோடு நட்புச்செய்தாய் முன்பு; இப்பொழுது, பாரி இறந்தானாகக் கலங்கிச் செயலற்று நீர்வார்கண்ணையுடையேமாய்த் தொழுது நின்னை வாழ்த்திச் செல்லுதும், பெரிய புகழையுடைய பறம்பே! கோற்றொழிலாகச் செய்யப்பட்ட திரண்ட குறிய வளையையணிந்த முன்கையினையுடைய மகளிரது மணம் கமழும் கரிய கூந்தலைத் தீண்டுதற்கு உரியவரை நினைந்து- எ - று.

பறம்பே! பெருவளம் பழுனி நட்டனை முன்; இனி நாறிருங் கூந்தற் கிழவரைப் படர்ந்து சேறுமெனக் கூட்டுக.
மன் : கழிவின்கண் வந்தது.

வாழியும் ஓவும் : அசைநிலை.

ஆனாக்கொழுந்துவையென்பதற்கு விருப்பம் அமையாத கொழுந் துவையெனினும் அமையும்.

(கு - ரை.) 1. புறநா. 33 : 21, 262 : 1.

2. அடப்பட்டு - சமைக்கப்பட்டு. துவை - உணவின் விசேடம்; துவையலென்றுங் கூறப்படும்.

3. "பல்வளம் பழுனிய" (மணி. 3 : 28)

6. "நீர்வார் கண்ணேன்" (நற். 143); "நீர்வார் கண்ணை" (குறுந். 22 : 1). கண்ணேம் : வினையெச்சமுற்று.
தன்மைப்பன்மை வினைக்குறிப்புமுற்று வினையெச்சக்குறிப்பானதற்கு மேற்கோள்; நன். சூ. 350, மயிலை; நன். வி. சூ. 351; இ. வி. சூ. 250, உரை.

7. பெயர் - புகழ்.

9. "கலிமயிற் கலாவத் தன்னவிவள், ஒலிமென் கூந்த லுரியவா நினக்கே" (குறுந். 225 : 6 - 7); "கூந்த லணைகொடுப்பேம் யாம்" (கலித். 101); "தோடேந்து பூங்கோதை வேண்டேங் கூந்தல் தொடேல்" (சீவக. 1229)

(113)