திணை - அது; துறை - பாணாற்றுப்படை.

அவனை அவர் பாடியது.

(இ - ள்.) வளைந்த கோட்டையுடைய சிறிய யாழை உலர்ந்த மருங் கிலே தழுவிக்கொண்டு அறிவோர்யார்தான் எனது துன்பத்தைத் தீர்க்கவென்று நயத்திற் சொல்லும் பாண! யான் சொல்லுகின்றதனை இப்பொழுது கேட்பாயாக; பாழூரின்கண் நெருஞ்சியினது பொன்னிறத்தையுடைய வாலியபூ எழுகின்ற ஞாயிற்றை எதிர்கொண்டாற்போல, வறுமையுற்ற யாழ்ப்புலவரது ஏற்குமண்டை, விளங்கிய புகழையுடைய கொண்பெருங்கானங்கிழானது குளிர்ந்த தாரையுடைய மார்பத்தை மலர்ந்து நோக்கின-எ - று.

‘ஏர்தரு சுடரி னெதிர்கொண் டாங்கு' என்புழி, இன்: சாரியை; அது, ¹தோற்றம்வேண்டாத் தொகுதிக்கண் வந்தது; அன்றி, ஐகாரம் விகாரத்தால் தொக்கதெனினும் அமையும்.

நயத்திற்கிளக்கும் பாணவென இயையும்; நயத்தின் அகலம் நோக்கினவென இயைப்பினும் அமையும்.
மண்டை அகலநோக்கி மலர்ந்தவென்ற கருத்து : கொடுக்கும் பொருள் மார்பின் வலியான் உளதாமாகலின், அகலநோக்கின வென்றதாகக் கொள்க.

(கு - ரை.) 1. "வணரமை நல்யாழ்" (பதிற். 41 : 2)

4. "பீரிவர் வேலிப் பாழ்மனை நெருஞ்சி" (பதிற்.26 : 10)

5. "வலனேர்பு திரிதரு பலர்புகழ் ஞாயிறு" (முருகு. 1-2)

4-5. நெருஞ்சிப்பூக்கள் சூரியனையே நோக்குதல் இயல்பு; "ஓங்கு மலைநாடன், ஞாயி றனையனென் றோழி, நெருஞ்சி யனையவென் பெரும் பணைத் தோளே" (குறுந். 315); " வானிடைச், சுடரொடு திரிதரு நெருஞ்சி போல" (அகநா.336); "வெஞ்சுடர் நோக்கு நெருஞ்சியில்" (இறை.சூ. 47, உரை, மேற், 296); "நீள்சுடர் நெறியை நோக்கு நிரையிதழ் நெருஞ்சிப்

பூப்போல்" (சீவக. 461); "அருந்தவர்க் காயினுந் திருந்துமுக மிறைஞ்சாது, செங்கதிர் விரும்பும் பைங்கொடி நெருஞ்சிப,் பொன்புனைமலர்" (பெருங்.2. 4 : 13 - 5); "ஏழுளைப் புரவியொ டெழுகதிர் நோக்கிய, சிற்றிலை நெருஞ்சிப் பொற்பூவென்ன" (கல்லாடம்,65 : 14 - 5)

6. "இலம்படு புலவ ரேற்றகை ஞெமர" (பரி.10 : 126); "இலம்படு புலவ ரேற்றகை நிறைய" (மலைபடு. 576). மண்டை : புறநா.103 ; 3, குறிப்புரை.

7. புறநா.154 : 13.

6-8. மண்டைமலர்தல் : புறநா.103. 3, 179 : 2 - 3, 393 : 4 - 5.

(155)

1 "தோற்றம் வேண்டாத் தொகுதிக் கண்ணும்" (தொல். புணரியல், சூ. 30)