111. புணர்ச்சி மகிழ்தல்
 

1101.

வளையல்  அணிந்த  இந்த  வடிவழகியிடம்;  கண்டு மகிழவும், கேட்டு
மகிழவும்,   தொட்டு   மகிழவும்,   முகர்ந்துண்டு   மகிழவுமான   ஐம்புல
இன்பங்களும் நிறைந்துள்ளன.
 

1102.

நோய்களைத்  தீர்க்கும்  மருந்துகள்  பல  உள்ளன;  ஆனால், காதல்
நோயைத் தீர்க்கும் மருந்து அந்தக் காதலியே ஆவாள்.
 

1103.

தாமரைக்  கண்ணான்  உலகம்  என்றெல்லாம்  சொல்கிறார்களே, அது
என்ன! அன்பு  நிறைந்த  காதலியின்  தோளில் சாய்ந்து துயில்வது போல
அவ்வளவு இனிமை வாய்ந்ததா?
 

1104.

நீங்கினால்    சுடக்கூடியதும்    நெருங்கினால்    குளிரக்கூடியதுமான
புதுமையான நெருப்பை இந்த மங்கை எங்கிருந்து பெற்றாள்.
 

1105.

விருப்பமான  பொருள்   ஒன்று,  விரும்பிய  பொழுதெல்லாம்  வந்து
இன்பம்  வழங்கினால்  எப்படியிருக்குமோ  அதைப் போலவே பூ  முடித்த
பூவையின் தோள்கள் இன்பம் வழங்குகின்றன.