பிறந்தார் மரத்தார் - இவ்வாறு மாட்சிமையில்லா உயர் குடியிற் பிறந்தார், நடுக்கடலில் மரக்கலத்திற் செல்வாரை ஒத்தவராவர்

(க-து.)தீயவற்றிற்கு அஞ்சி வாழ்தற்குரிய உயர் குடிப் பிறப்பே சிறந்தது.

(வி-ம்.)எல்லாம் என்றது முழுமையும் என்னும் பொருட்டு. ஈதல் இல்லொழுக்கங்களுள் தலையானதாதலின், அதற்கு இயலாமை நேரின் அது முற்றும் அஞ்சுதற்குரிய¹தென்பது கருத்து. மரக்கலம் என்னும் பெயர், கலம் என்னுஞ் சொல்லால் வழங்குமாப்போல் மரம் என்னும் பெயராலும் வழங்குவதாயிற்று. முற்செய்யுளைப் போல் இதுவும் பழித்ததுபோலப் புகழ்தலாதலின், ‘மாணாக்குடி' எனப்பட்டது.

(5)

146. இனநன்மை இன்சொல்ஒன் றீதல்மற் றேனை
மனநன்மை என்றிவை யெல்லாம் - கனமணி
முத்தோ டிமைக்கு முழங்குவரித் தண்சேர்ப்ப!
இற்பிறந்தார் கண்ணே யுள.

(பொ-ள்.)கனமணி முத்தோடு இமைக்கும் முழங்கு உவரித் தண் சேர்ப்ப-சிறப்புடைய மாணிக்க முதலிய மணிகள் முத்துக்களுடன் கிடந்து ஒளிர்கின்ற ஒலிக்குங்கடலின் குளிர்ச்சியான துறைவனே! இனநன்மை, இன்சொல், ஒன்று ஈதல், ஏனை மனநன்மை என்று இவையெல்லாம் இல்பிறந்தார் கண்ணே உள-நல்லார் கூட்டுறவு, இன்சொல்லுடைமை, வறியார்க்கு ஒன்று ஈதல், ஏனை மனத் தூய்மைஎன இந் நற்பண்புகளெல்லாம் உயர்குடிப் பிறந்தாரிடமே அமைந்திருக்கின்றன.

(க-து.)உயர்குடிப் பிறப்பு நற்பண்புகட்கு இடமானது.

1. குறுந். 137.