(க-து.)செல்வமும் கல்வியும் மெய்யுணர்வுமுடைய பெரியோர், யாண்டும் உதவியும் பணிவும் அடக்கமு முடையராயிருப்பர்.

(வி-ம்.)சிறிய தன்மையுடையார்போல் தாழ்வுடையராயிருத்தலின் அப் பணிவுடைமையை ஈண்டுச் சிறு தகைமையென்றார். சிறப்பு நோக்கி வீடுபேறு, ஒன்றெனப்பட்டது. தற்சேர்ந்தார், ஒருமை பன்மை மயக்கம். "தற்சேர்ந்தார் ஒற்கம் கடைப்பிடியாதார்"¹என்றார் பிறரும். பெரியாராயினார் இத்தகையினராதலின் இது தெரிந்து இந் நிலைகட்கேற்ப அவர்பாற் பிழைபடா தொழுகிக் கொள்க வென்பது கருத்து. இவ்வதிகாரத்தில் பெரியாரியல் புரைப்பனவாய் வந்திருக்கும் இது போன்ற செய்யுள்கட்கும் இவ்வாறுரைத்துக் கொள்க.

(10)

18. நல்லினம் சேர்தல்

[உயர்ந்த பண்புடையார் கூட்டத்திற் சேர்ந்து பழகுதல்.]

171. அறியாப் பருவத் தடங்காரோ டொன்றி
நெறியல்ல செய்தொழுகி யவ்வும் - நெறியறிந்த
நற்சார்வு சாரக் கெடுமே வெயின்முறுகப்
புற்பனிப் பற்றுவிட் டாங்கு.

(பொ-ள்.)அறியாப் பருவத்து அடங்காரோடு ஒன்றி நெறியல்ல செய்தொழுகியவும் - அறிய வேண்டுவன அறியாத சிறுபருவத்தில் அடங்கியொழுகாத தீயோருடன் சேர்ந்து முறையல்லாதவற்றைச் செய்தொழுகிய தீயகுணங்களும், வெயில் முறுகப் புல் பனிப்பற்று விட்டாங்கு-வெயில் கடுகுதலால் புல்நுனியைப் பனியின் பற்றுதல் விட்டாற்போல, நெறியறிந்த நற்சார்வு சாரக் கெடும் - நன்னெறி தெரிந்தொழுகும் உயர்ந்த பெரியோர் சார்பைச் சார்ந்து பழகுதலால் கெடும்.

1. ஐந். ஐம். 48.