"'ஐயநீ யாடுதற் கமைந்த சூதுமற்
றெய்துநல் குரவினுக் கியைந்த தூதுவெம்
பொய்யினுக் கருந்துணை புன்மைக் கீன்றதாய்
மெய்யினுக் குறுபகை என்பர் மேலையோர்"

என்றும் ஆன்றோர் கூறுமாற்றால், சூதர் கழகம் புகுதல் ஏதந்தருமென்றார்.

(98)

¹உரற்களத்து மட்டிலும் பெண்டிர்கள் மேலும்
நடுக்கற்ற காட்சியார் நோக்கார் எடுத்திசையார்
இல்லம் புகாஅர் விடல்.

(இ-ள்.) நடுக்கு அற்ற காட்சியார் - சோர்வற்ற அறிவுடையவர், உரல் களத்தும் - ஆரவாரஞ் செய்யுமிடத்தும், அட்டிலும் - மடைப்பள்ளியிலும், பெண்டிர்கள் மேலும் - பெண்கள் உறையிடத்தும், நோக்கார் -, எடுத்து இசையார் - எடுத்துரையார், இல்லம் புகார் - இல்லத்துட் புகார்; ஆதலால் நீ விடுக.

(ப. பொ-ரை.) சோர்வற்ற அறிவை யுடையவர் ஆரவாரஞ் செய்யுமிடத்தும் மடைப்பள்ளியிலும் பெண்டிர்கள் உறையிடத்தும் நோக்கார், எடுத்துரையார், இல்லத்துட்புகார் : ஆதலால் நீ விடுக.

(க-ரை.) ஆரவாரஞ் செய்யுமிடத்தைப் பார்த்தலும், மடைப்பள்ளியில் எடுத்துரைத்தலும், பெண்டிர்கள் உறைகின்ற இடத்துப் புகுதலும் ஆகா.

"எடுத்திசையார் இல்லம் புகாஅ விடல்" என்பதற்கு வாருமென்று அன்பாக அழையாத மனையிடத்துப் புகுதலொழிக என்றுரைத்தலுமாம்.

அட்டில் - அடு + இல். நடுக்கு : நடுங்கு என்னும் முதனிலை திரிந்த தொழிற்பெயர்.

(99)

நடுக்கற்ற காட்சியவர் - கலக்கமற்ற மெய்யறிவினையுடையவர்கள், உரல்களத்து நோக்கார் - மகளிர் உரலில் ஒன்றையிட்டுக் குற்றிக்கொண்டிருக்கும் பொழுது அவர்களைப் பாரார்; அட்டில் எடுத்து இசையார் - சமையலறையில் புகுந்து தமது கருத்தை எடுத்துரையார்; பெண்டிர்கள் மேவும் இல்லம்புகார் = பெண்டிர் தனித்துறையும் இல்லத்துட்புகார் ஆதலால், மேலே கூறிய இடங்களில் நோக்குதலும், உரையாடலும், புகுதலும் தவிர்க.

1.‘மேலும்' என்பது மேவும் என்று இருத்தல் வேண்டும்.