இனி, நட்பும் அதன் மறுதலையாகிய பகையும் அவை போன்ற குணங்களும் செயல்களும் நிலைமைகளும் பற்றிப் பன்னீரதிகாரங்களாற் கூறத்தொடங்கி, முதற்கண் தற்பகையாகிய பேதைமையைப் பற்றிக் கூறுகின்றார். பேதைமை பேதையின் தன்மை. பேதை நல்லதை விட்டுத் தீயதைத் தெரிந்துகொள்பவனும் அறிவித்தாலும் அறியாதவனுமாகிய அறிவிலி.

"பூத்தாலுங் காயா மரமுள மூத்தாலும்
நன்கறியார் தாமும் நனியுளர் பாத்தி
விதைத்தாலும் நாறாத வித்துள பேதைக்
குரைத்தாலுந் தோன்றா துணர்வு." ( பழமொழி. 63)