(வி - ம்.) தம் என்றது - கணிகையரை. கழியன்பு என்றது ஈண்டு
மிக்க காமம் என்றவாறு. வன்கண்மை - கண்ணோட்ட மின்மை.

     கணிகை மகளிர் தம்மை விரும்பிவரும் காமுகக் கயவரின்
பொருளெல்லாம் தம்பாலகப்படுத்திக்கொண்டு பின்னர் அவரழிந்தொழியும்படி
கண்ணோட்டமின்றித் தள்ளிவிடுதலாலே, வணிகரீட்டிய பொருளையெல்லாம்
அகப்படுத்திக்கொண்டு அவரைக் கண்ணோட்டமின்றி அகற்றி விட்டு
அப்பொருளோடு கடலினூடு ஆழ்ந்துவிடுகின்ற மரக்கலத்தையும் ஒப்பர்
என்றவாறு.                                                   (58)

     (இ - ள்.) பைத்துஅரவு அல்குல் பொன் பாவையின் நல்லவர் -
நச்சுப் பையினையுடைய பாம்பினது படம்போன்ற அல்குலையுடைய
பொன்னாலியன்ற பாவை போலும் அழகையுடைய கணிகை மகளிர்; ஒத்த
பொருளால் உறுதி செய்வார்களை - தம் தகுதிக்கேற்ற பொருள் கொடுத்துத்
தமது வாழ்க்கையினை நிலை பெறுத்துகின்ற ஆடவர்களை; எத்திறத்தானும்
- எல்லா வழிகளானும்; வழிபட்டு ஒழுகலின்-வழிபட்டு நடத்தலாலே;
பத்தினிப் பெண்டிர் படியும் புரைப - கற்புடை மகளிர் தன்மையையும்
ஒப்பர் என்பதாம்.

     (வி - ம்.) கணிகை மகளிர் - தாம் விரும்புகின்ற பொருளைத் தமது
தகுதிக்கேற்ப வழங்குகின்ற ஆடவர்களை எவ்வாற்றானும் வழிபாடு செய்து
பேணி யொழுகுதலாலே அவர்கள் கற்புடை மகளிரையும் ஒப்பர் என்றவாறு.                                                       (59)

     (இ - ள்.) மலர் அன்ன கண்ணார் - தாமரை மலர்போன்ற அழகிய
கண்ணையுடைய கணிகை மகளிர்; வீ பொருளானை அகன்று-தம்மை நயந்து
தமக்கு வழங்கி அழிந்துபோன பொருளையுடைய ஆடவனைக்
கைவிட்டுப்போய்; ஓர் பிறன்மா பொருளான் பக்கம் - மற்றோர் ஏதிலனாகிய
பெரிய செல்வன்பால் சென்று; மரண நயத்தலின் - மாட்சிமை யுண்டாக
விரும்புதலாலே; மேய்புலம் புல்அற - தாம் தொன்று தொட்டு மேய்கின்ற
நிலம் புல் அற்று வறிதாய விடத்தே; மற்று ஓர் புலம்புகு மாவும்-வேறோர்