புன்னிரம்பிய நிலத்தைத் தேடிச் செல்லும் விலங்குகளையும்; புரைப - ஒப்பர்
என்பதாம்.

     (வி - ம்.) வீ பொருளான்-அழிந்த பொருளையுடையோன் -
வறுமையுற்றவன்.

     கணிகை மகளிர் பொருள் அழிந்தவனைக் கைவிட்டுப் புதுவதாக
வேறொரு பொருளுடையான்பாற் புகுதலாலே, தாம் மேய்கின்ற நிலம் புல்லற்று
வறிதாயவுடன் மற்றுமொரு புல் நிரம்பிய நிலத்திற் புகுகின்ற விலங்குகளையும்
ஒப்பரென்றவாறு.                                                      (60)

     (இ - ள்.) வம்பு இளமெல்முலை வாள் நெடு கண்ணவர் - கச்சணிந்த
இளமையும் மென்மையுமுடைய முலையினையும் வாள் போன்ற நெடிய
கண்களையும் உடைய கணிகை மகளிர்; நுண் பொருளானை
நுகர்ந்திட்டு-தேய்ந்தழிகின்ற பொருளையுடையவனை அவன் செல்வந்
தேயுந்துணையும் அவனோடு கூடி இன்புற்றிருந்து அப் பொருள் அழிந்த
பின்னர்; நன்கு வான் பொருள் உடையானை - நன்கு சிறந்த
பொருளுடையானாகிய மற்றொருவனை விரும்பிப் போதலாலே; கொம்பிடை
வாழுங் குரங்கும் புரைப - மரக் கொம்புகளிலே வாழ்ந்து அவற்றுள்
ஒன்றன்கண்ணுள்ள மலர் காய் கனி முதலியவற்றைத் தின்று தீர்த்தபின்
மற்றொரு கிளையிற் றாவிச்செல்லுகின்ற குரங்கையும் ஒப்பர் என்பதாம்.

     (வி - ம்.) நுண்பொருள் தேய்ந்து நுண்ணியதாகிய பொருளை -
அஃதாவது அழிந்து குறைவுற்ற சிறுபொருள்.

     கணிகையர் ஒருவன்பாலுள்ள பொருளைக் கவர்ந்த பின்னர் அவன்
வறியனாக மற்றொரு பொருளுடையானைச் சேர்வதனால் ஒரு கொம்பிலுள்ள
இரை தீர்ந்த பின்னர் மற்றோரு கிளைக்குத் தாவுகின்ற குரங்கையும் ஒப்பர்
என்றவாறு.                                               (61)

     (இ - ள்.) அரும்பு இளமெல் முலைஅம் சொல் அவர் தாம் - 
கோங்கரும்பு போன்ற இளமையுடைய மெல்லிய முலையினையும்,