:: TVU ::

நகரப் படலம்

யாழின் இசையை ஒத்திருக்கும்; எழிலிசை மடந்தையர்- வனப்பு பொருந்திய பெண்களது; இன்சொல் இன் இசை- இனிய சொற்களாகிய இன்னிசை; பழையர்தம் சேரியில்- கள் விற்கும் பழையர்களின் சேரியிலே; பொருநர் பாட்டுஇசை- கூத்தர்கள் பாடும் இசையை ஒத்திருக்கும். பருவம் நிரம்பாதவர்கள் பருவ மங்கையர் பருவ முதிர்ந்தவர் எனப் பெண்களை மூவகைப்படுத்தி அவர்களின் பேச்சுக்கு உவமை கூறினார். குதலை: வடிவச் செம்மை பெறாத சொல். இது முதல் ஆறு பாடல்கள். ஆடல் பாடல் முதலிய விளையாடல்களைக் கூறுவனவாம். 43
136.	கண்ணிடைக் கனல் சொரி களிறு. கால் கொடு மண்ணிடை வெட்டுவ; வேட்கை மைந்தர்தம் பண்ணைகள் பயில் இடம் குழி படைப்பன; சுண்ணம்அக் குழிகளைத் தொடர்ந்து தூர்ப்பன.
கண்ணிடைக் கனல் சொரி களிறு- (கோபத்தால்) கண்களிலே நெருப்பைச் சொரியும் ஆண்யானைகள்; கால் கொடு மண்ணிடை வெட்டுவ- கால்களால் நிலத்தை வெட்டுவனவாம்; வேட்கை மைந்தர்தம்- பார்ப்பவர் விரும்பும் அழகிய இளைஞர்களின்; பண்ணைகள் பயில் இடம்- விளையாட்டுகள் நடைபெறும் இடங்கள்; குழி படைப்பன- குழிகளை உடையனவாம்; அக்குழிகளைச் சுண்ணம் தொடர்ந்து தூர்பன- அந்தக் குழிகளை அவ்விளைஞர் அணிந்த வாசனைப் பொடிகள் தூர்ப்பனவாகும். இளங் குமரர்கள் யானைகளை உடன் கொண்டு சென்று விளையாடுவர். அந்த யானைகள் நிலத்தைக் காலால் வெட்டி குழி செய்கின்றன. அக் குழிகள் வாசனைப் பொடிகளால் தூர்க்கப்படுகின்றனவாம். பண்ணை - விளையாட்டு. 44
137.	பந்துகள் மடந்தையர் பயிற்றுவாரிடைச் சிந்துவ முத்தினம்; அவை திரட்டுவார் அந்தம் இல் சிலதியர்; ஆற்ற குப்பைகள். சந்திரன் ஒளி கெட. தழைப்ப தண் நிலா.
பந்துகள் பயிற்றுவார் மடந்தையர் இடை- பந்தாடுபவராகிய இளம் பெண்களிடமிருந்து; முத்தினம் சிந்துவ- (அவரது அணிகலங்களிலிருந்து) முத்துக்கள் சிந்துகின்றன; அவை திரட்டுவோர்- அம்முத்துக்களைச் சேகரித்துச் சேர்க்கும்; அந்தம் இல் சிலதியர்- அளவில்லாத பணிப் பெண்கள்; ஆற்று குப்பைகள்- குவித்த அந்த முத்துக் குவியல்கள்; சந்திரன் ஒளிகெட தண் நிலா தழைப்ப- சந்திரனது ஒளியும் குறையுமாறு குளிர்ந்த நிலா ஒளி தழைப்பனவாம்.