:: TVU ::

பால காண்டம்

பெண்கள் பந்து விளையாடும் இடங்களில் அணிகலன் முத்துகள் சிதறி விழ. பணிப்பெண்கள் அவைகளை எல்லாம் சேகரித்து ஆங்காங்கு குவித்து வைக்கின்றனர். அந்தக் குவியல்கள் சந்திர ஒளி கெடுமாறு- வெண்மைநிற ஒளியை உடையனவாய் விளங்குகின்றன. பயிற்றுவார்: ஆடுகின்ற மகளிர் தன் வினைப் பொருளில் வந்த பிற வினையாலணையும் பெயர். சிலதியர்: குற்றேவல் மகளிர். ‘ஆற்றின்’ என்ற பெயரெச்சத்தின் இன் என்னும் இடைநிலை தொக்கு. ‘ஆற்ற’ என நின்றது. 45
138.	அரங்கிடை மடந்தையர் ஆடுவார்; அவர் கருங் கடைக் கண் அயில் காமர் நெஞ்சினை உருங்குவ; மற்று. அவர் உயிர்கள் அன்னவர் மருங்குல்போல் தேய்வன; வளர்வது. ஆசையே.
அரங்கிடை மடந்தையர் ஆடுவார்-நடன அரங்குகளிலே பெண்கள் நடனம் ஆடுவார்கள்; அவர கருங் கடைக்கண் அயில்- அவர்களின் கருமையான கடைக்கண்களாகிய வேல்கள்; காமர் நெஞ்சினை உருங்குவ- காதல் மிக்க ஆடவர்களின் மனத்தை உருக்குவனவாம்; மற்று அவர் உயிர் அன்னவர் மருங்குல் போல்- பின்னும் அவ்வாடவரின் உயிர்கள் அப்பெண்களின் இடைகளைப் போல; தேய்வன- மெலிவனவாகும்; வளர்வது ஆசை- அந்த மைந்தர்களுக்கு அம்மகளிரின் மீது ஆசை பெருகுவதாகும். நடன அரங்கில் நடனமாடும் மகளிரின் பார்வை அவர்களது காதலர்களான ஆண்களின் உயிரை உண்ணும். அம்மைந்தர்தம் உயிர் அம்மகளிரது இடையென மெலியும். ‘உறங்குவ’ என்பது ‘உருக்குவ’ என்பதன் மெலித்தல் விகாரம். உருங்குதல்: உண்ணுதல் என்றும் பொருள் கொள்ளலாம். இதனை “அரவின் உடலுயிர் உருங்குவணம்” என்று பரிபாடலாலும் (பரி. 4: 42) அறியலாம். 46
139.	பொழிவன சோலைகள் புதிய தேன் சில; விழைவன தென்றலும் மிஞிறும் மெல்லென நுழைவன; அன்னவை நுழைய. நோவொடு குழைவன. பிரிந்தவர் கொதிக்கும் கொங்கையோ.
பொழிவன சோலைகள் புதிய தேன் சில- சில சோலைகள் புத்தம் புதிய தேனைச் சொரிவன; விழைவன தென்றலும் மிஞிறும் மெல்லென நுழைவன- அத்தேனை விரும்பி தென்றலும் வண்டும் மெல்ல அச் சோலைகளில் நுழைவனவாம்; அன்னவை நுழைய- அவை அவ்வாறு நுழைய; பிரிந்தவர் கொதிக்குக் கொங்கை- தலைவனைப் பிரிந்த மகளிரின் (காமத்தால்) கொதிக்கும் தனங்கள்; நோவொடு குழைவன- வருத்தத்துடன் மெலிவனவாயின.