:: TVU ::

238

பால காண்டம்

அந்தணன் கூறுவான் - நான்கு வேதங்களிலும் வல்ல அந்தணனாகிய விசுவாமித்திரன் கூறுவானானான். வெறிந்த: மணம் வீசுகின்ற (இங்குத் தீயநாற்றம் வீசுகின்ற). சிவந்த கூந்தலை உடையவளாதலின் ‘ செம்மயிர்’ என்றார். ஏற்றல்: ஏற்றுக்கொள்தல். பார்க்கிலா: ஈறுகெட்ட எதிர்மறைப் பெயரெச்சம். ராமன் வாய்திறந்து கூறவில்லையாயினும்; மனத்திடை நினைந்ததை அறிந்த முனிவனை ‘’நான்மறை அந்தணன்’’ எனச் சிறப்பித்தார். 37
376.	‘தீது என்றுள்ளவை யாவையும் செய்து. எமைக் கோது என்று உண்டிலள்; இத்தனையே குறை; யாது என்று எண்ணுவது? இக் கொடியாளையும். மாது என்று எண்ணுவதோ? மணிப் பூணினாய்!
தீது என்று உள்ளவையாவையும் செய்து - தீமை என்று இருப்பவையாகிய எல்லாச் செயல்களையும் செய்துமுடித்து; எமை. கோது என்று உண்டிலள் - எம்மைப் போன்ற முனிவர்களைச் (சாரமில்லாத) சக்கை என்று உண்ணாது விட்டனள்; இத்தனையே குறை - அவள் செய்த தீய செயல்களில் இவ்வளவவே குறை; யாது என்று எண்ணுவது - இத்தகையவளை என்னவென்று நினைப்பது; இக்கொடியாளையும் - இத்தகைய கொடுஞ்செயல் உடையவளையும்; மணிப்பூணினாய் - மணிகளாலான அணிகலன்களை அணிந்திருக்கும் ராம பிரானே!; மாது என்று எண்ணுவதோ - பெண் என்று நினைத்தல் ஒண்ணுமே? கூடாது என்றபடியாம். தீது: தீய செயல்கள். உள்ளவை: குறிப்பு வினையாலணையும் பெயர். எம் உளப்பாட்டுப் பன்மை. கோது: சாரமற்றது (சக்கை). குற்றம் குறை: குறைவு. அரசகுமாரன் என்பதால் ‘’மணிப்பூணினாய்’’ என்றார். 38
377.	‘நாண்மையே உடையார்ப் பிழைத்தால். நகை; வாண்மையே பெற்ற வன் திறல் ஆடவர் தோண்மையே இவள் பேர் சொலத் தோற்குமேல். ஆண்மை என்னும் அது ஆரிடை வைகுமே?
நாண்மையே உடையார்ப் பிழைத்தால் நகை- நாணம் முதலான பெண்மைக் குணம் உடையவர்களுக்குத் தீங்குசெய்தால் அது கண்டு வீரம் மிக்க ஆடவர் நகைத்துப் பரிகசிப்பர்; வாண்மையே பெற்ற வன்திறல் ஆடவர் தோண்மையே - வாள்முதலான போர்க் கருவிகளில் வல்ல வலிமைமிக்க வீரர்களான ஆண்களின் தோளாற்றலும்; இவள் பேர் சொலத் தோற்கு மேல் - இத்தாடகையின் பெயரைச் சொல்லக் கேட்டவுடன் தோற்று விடுமென்றால்; ஆண்மை என்னும் அது ஆரிடை வைகும் - ஆண்மை என்று கூறும் அந்த அஞ்சாத பண்பு யாரிடம் இருக்கும். (சிந்தித்துப்பார்) என்றபடி.