:: TVU ::

கார்முகப் படலம்

441

இராமனது நீண்ட கைகள்; படாதேல் - பற்றாமல் போனால்; (இராமன் சீதையைப் பாணிக் கிரகணம் செய்யா விட்டால்); வாள் நுதல் நங்கையும் - ஒளியுள்ள நெற்றி படைத்த சீதையும்; வாழ்வு இலள் - (இனி) வாழ்வு அற்றவளே; என்பார் - என்று சொல்வார்கள். நங்கையும் - உம்மை இராமனும் வாழ்வு இலன் என்பதைக் குறிக்கும். நங்கை வாழ்விலள் என்பதற்கு - சீதை மணமின்றிக் கன்னியாகவே இருக்க வேண்டியவள்தான் என்ற கருத்துப் புலனாகும். இதுவரை ஆற்றல் மிக்க அரசர் பலரும் தோற்றோடிய செயலை அறிந்தவராதலால் இந்தக் குமரனும் அத்தகையவன் ஆவனோ என்று மாதர் இரங்கிக் கூறினர். 28
694.	கரங்கள் குவித்து. இரு கண்கள் பனிப்ப. ‘இருங் களிறு இச் சிலை ஏற்றிலன் ஆயின். நரந்த நறைக் குழல் நங்கையும். நாமும். முருங்கு எரியில் புக மூழ்குதும்’ என்பார்.
கரங்கள் குவித்து- (சில மாதர் தம் வழிபடு தெய்வங்களை நினைந்து) தம் கைகளைக் கூப்பிக் கொண்டு; இருங்களிறு - ஆண்யானை போன்ற இக்குமரன்; இச் சிலை - இந்த வில்லை; இரு கண்கள் பனிப்ப - எங்களுடைய இரு கண்களும் ஆனந்தக் கண்ணீர் சொரியுமாறு; ஏற்றிலன் ஆயின் - நாண் ஏற்றாமல் போவானேயானால்; நரந்தம் நறை - கஸ்தூரி மணம் கமழும்; குழல் நங்கையும் - கூந்தலையுடைய சீதையும்; நாமும் - நாமும்; முருங்கு எரியில்- எரிக்கும் நெருப்பில்; புக - அழுந்தி; மூழ்குதும் - மூழ்குவோம்; என்பார் - என்று சொல்வார்கள். ‘இக் குமரன் வில் இறுக்காவிட்டால் சீதை கன்னியாகவே இறக்கவேண்டிவரும். அதைவிட நெருப்பில் பாய்ந்து உயிர் விடுதலே மேலானது. நம் அன்பான தோழி அவ்வாறு செய்தால் நாமும் அவளோடு எரிபுகுந்து இறப்போம்’ என்றார் சில பெண்கள். நரந்தம் - கத்தூரி ‘நரந்தம் அரைப்ப நறுஞ்சாந்து மறுக’ - மதுரைக் காஞ்சி. 553. 29
695.	‘வள்ளல் மணத்தை மகிழ்ந்தனன் என்றால் “கொள்” என முன்பு கொடுப்பதை அல்லால. வெள்ளம் அணைத்தவன் வில்லை எடுத்து. இப் பிள்ளை முன் இட்டது பேதைமை’ என்பார்.
வள்ளல் - கொடுக்கும் குணமுடைய சனக மன்னன்; மணத்தை - (சீதையின்) திருமணத்தைச் (செய்ய) ; மகிழ்ந்தனன் என்றால் - விரும்பியிருப்பான் என்றால்; முன்பு - (இந்த இராமனைக் கண்டவுடனே) முதலில் தானே; கொள் என - (இச் சீதையை) மணந்து கொள்க என்று; கொடுப்பதை அல்லால் - (அவளை)