சிறை மா வண்டு- சிறகுகளை உடைய கரிய (ஆண்) வண்டு; கூடிய
நறை வாயில்கொண்ட - மிக்க தேனை வாயிற் கொண்டன வாய்; விழி
கொள்ளா -(அம்மயக்கத்தால்) விழி திறந்து  பார்க்க மாட்டாதவையாய்;
மூடிய களி மன்ன -கண்ணை மூடிக்கொள்ளுமாறு போதை பொருந்த;
முடுகின நெறி காணா - விரைந்து  (பறந்து)செல்லுதற்குரிய வழியைக்
காணமாட்டாதனவாய்;  அந்தரின் - குருடரைப்போல; முன்னம்இசை
பாடிய பெடை கண்ணா வருவன பல- முன்னால் இசைபாடிச் செல்கின்ற
பெண் வண்டைக்கண்ணாகக் கொண்டு வருவன பலவற்றை;  காணாய்-.

     அன்னம் மென் நடையாய்! - அன்னப் பறவை போன்ற மெல்லிய
நடையை உடையவளே!; பொன் அணி நிற வேங்கை,  கோங்குகள் -
பொன் போன்ற அழகிய நிறம்படைத்த வேங்கைமரமும் கோங்க மரமும்;
கன்னியர் அணிகோலம் கற்று அறிகுநர் என்ன - கன்னிப்பெண்கள்
அணிகின்ற அழகுக் கலையைக் கற்றுப் பழகுபவர்களைப் போல; புது மென்
பூ -புதிய மென்மையான பூக்களை;  நின் அளக நல் நுதல் அப்பும் -
உன்னுடைய கூந்தலோடு கூடிய நல்ல நெற்றியிலே அப்புகின்ற;  சின்னம்
மென் மலர்மான- விடு பூக்களாகிய மெல்லியமலரை ஒப்ப; சிந்துவ பல-
சிதறுகின்ற பலவற்றையும்;  காணாய் -.