வசிட்டரும் வேந்தரும் நதிப்புனலில் சென்று நிற்க, இராமனும்
நீர்க்கடன் செய்யும் கிரியை முறைகளை நோக்கினானாம்.              80

     உயிர்தொரும் - எல்லா உயிர்களிடத்தும்; ஒக்க நின்று - ஒரு
தன்மையாகஉள்ளிருந்து; உணர்வு நல்குவான் - அவற்றிற்கு உணரும்
தன்மையை அருளுபவனாகிய(பரம்பொருள்) இராமன்;  புனலிடை
புக்கனன் - நதிநீரிற் புகுந்து; முழுகி -நீராடி; போந்தனன் - வெளியேறி;
தக்க நல் மறையவன் - சிறந்த நல்லவேதங்களை உணர்ந்தவனாகிய
வசிட்டன்; சடங்கு காட்ட - செய்ய வேண்டிய சிறந்தகிரியைகளை
வழிப்படுத்த; தான்-; முக்கையின் நீர் - கையினால் மூன்றுமுறை முகந்து
எடுத்துவிடும் தருப்பண நீரை; விதிமுறையின் - நூல்களில் விதித்த
முறைப்படி;  ஈந்தனன் - (தன் தந்தையை நினைத்து) கொடுத்தான்.

     எல்லா உயிர்களுக்கும் உள்ளுறைந்து உணர்வு தரும் பரம்பொருள்,
இராமன் என இப்போது மானுட வேடத்தில் வந்தான் ஆதலின்
அதற்கேற்ப வேதவிதிப்படி சடங்குகள் காட்டத் தருப்பணம் செய்த
தந்தையை வழிபட்டான் என்பதாம்.                               81

     ஆனவன் - தருப்பணம் செய்தவனான இராமன்;  பிறஉளயாவும்
ஆற்றி- வேறுபிண்டம் அளித்தல் முதலாக உள்ள சடங்குகளையும் செய்து
முடித்து; பின் - பிறகு; மான மந்திரத்தவர் - பெருமை  படைத்த
மந்திரிகளும்; மன்னர் - அரசரும்; மா தவர் - பெரிய முனிவர்களும்;
ஏனையர் பிறர்களும் - மற்றும் உள்ளவர்களும்; சுற்ற- தன்னைச் சுற்றிவர;
ஏகினன் - சென்று; சானகி இருந்த அச்சாலை- சீதா பிராட்டி இருந்த
அந்தக் குடிலை; எய்தினான் - அடைந்தான்.

     ‘பிற உள’ என்பது  நீர்க்கடன் செய்த பின்னர்அளிக்கப்படுவதாகிய
பிண்டம் முதலியவற்றைக் குறிக்கும். இராமன் தயரதனின் மூத்த மகனாதலின்
இறந்த முதல் நாள் தொட்டுப் பதின்மூன்றாம் நாள்வரை செய்யத் தகும்
கருமங்கள் அனைத்தும்செய்ய வேண்டியவனாவான் என்பதுபற்றி இவ்வாறு
கூறினார்.