வேதியர்கள் வேதமொழி வேறுபல கூற - அந்தணர்கள் பல்வேறு
வகைப்பட்ட வேத வாக்கியங்களைச் சொல்ல; காதல் மிக நின்று எழில்
கமண்டலுவின் நல்நீர் மாதவர்கள் வீசி - அன்பு மிகுதலால் சூழ்ந்து
நின்று அழகிய கமண்டலங்களிலுள்ள நல்ல நீரை மிக்க தவமுடையவர்கள்
தெளித்து; நெடுமாமலர்கள் தூவ - அழகிய பெரிய மலர்களை மேலே
சொரிய, (அகத்தியர் இராமனை); போது மணம் நாறு குளிர் சோலை
கொடு புக்கான் - மலர்கள் மணம் வீசும் குளிர்ந்த சோலைக்குள்
அழைத்துக் கொண்டு போனார்.

     வேதமந்திரங்களைக் கூறி நன்னீர் தெளித்து மலர் தூவல் அம்முனிவர்
செய்யும் உபசார வகை. கமண்டலு - கமண்டலம். குண்டிகை கரசும் எனவும்
வழங்கப்பெறும். போது என்பது அப்பொழுது மலரும் நிலையில்
உள்ளமலர்.                                                  48

    அமலன் பொழிலகத்து(ப்) பொருந்த இனிது புக்கான் - இராமன்
சோலைக்குள் மனம் ஏற்றிட இனிமையாய்ப் புகுந்தவனாய்; அவன் விருந்து
அமைத்தபின் விரும்பினன் - அம்முனிவர் விருந்திட்டு உபசரித்த பின்
மகிழ்ந்திருந்தான்; விரும்பி(அப்போது அகத்தியர்) மகிழ்ந்து
(இராமனைப்பார்த்து); அருட்கு அரச - கருணைக்குத் தலைவனே!;
இருநீதவம் இழைத்த எனது இல்லிடையில் வந்து மிக்க தவத்தைச் செய்த
என்னுடைய வீட்டில் எழுந்தருளி; என் அருந்தவம் முடித்தனை
என்றான் - என்னுடைய அரிய தவத்தை நிறைவேற்றினாய் என்று கூறினார்.