தழல் எடுத்தான் மலை எடுத்த தனி மலையே - தீயைக் கையில்
ஏந்திய சிவனின் கயிலை மலையைக் கையால் எடுத்த ஒப்பற்ற மலை
போன்ற அண்ணாவே!; நீ நெடுநிலத்து நிலை எடுத்து இருக்க - நீ
இந்தப் பெரிய உலகில் நிலை பெற்ற புகழால் விளங்கி நிற்கும் போது;
தாபதர்கள் சிலை எடுத்துத் திரியும் இது சிறிது அன்றோ - தவம்
புரிவோர் வில்லேந்தி நடமாடுவது உன் புகழுக்கு இழுக்கல்லவா?;
(அன்றியும்) தேவர் எதிர் தலை எடுத்து விழியாமைச் சமைப்பதே -
தேவர்கள் முன்னே தலை நிமிர்ந்து பார்க்காமல் வெட்கி நிற்பதும்
ஆகக்கூடியதோ?; இவை காணவாராயோ - (எனக்கு நேர்ந்த இச்
சிறுமைகளை) நீ பார்க்க வரமாட்டாயா?

     தாபதர் - இராமலக்குவர். தவவேடம் பூண்டு வனத்தில் இருந்த
நிலையை இது சுட்டும் 'இவை காண' என்பது தன் உறுப்புகள் அறுப்புண்டு
துன்புறும் நிலையைக் காண எனவும் பொருள்படும். சமைத்தல் -
அமைத்தல்.

     சிவன் கையில் அனலேந்தியது - தாருக வன முனிவர்கள் சிவனை
அழிக்க ஏவிய தீயினைச் சிவன் தன் கையில் ஏந்திய செயலைக் குறிக்கும்.
மலை இராவணனுக்கு உவம ஆகுபெயர்.                          101

    ஊழியினும் சலியாத மூவர்க்கும் தானவர்க்கும் வானவர்க்கும்
வலியானே - கற்ப முடிவிலும் ஆற்றல் தளராத மும் மூர்த்திகளுக்கும்
அசுரர்களுக்கும் தேவர்களுக்கும் மிக்க வலிமை கொண்ட இராவணனே;
புலி தானே புறத்து ஆக(க்) குட்டி கோட்படாது - தாய்ப் புலியானது
பக்கத்திலிருக்க அதன் குட்டி எவராலும் பிடிக்கப்பட்டுத் துன்புறாது; என்ன
ஒலி ஆழி உலகு உரைக்கும் உரை பொய்யோ - என்று முழக்கத்துடன்
கூடிய கடல் சூழ்ந்த உலக மக்கள் கூறும் பழமொழி பொய்யோ?;
யான்பட்ட வலி காண வாராயோ - நான் அடைந்த கொடும் துன்பத்தைப்
பார்க்க வரமாட்டாயா?