ஒரு பேதை - (அவர்களோடு உள்ள) ஓர் இளம் பெண்; மண்ணில்-
இவ்வுலகத்திலும்; நோக்க அரு வானினில் - எளிதாகக் காண முடியாத
மேலுலகத்திலும்; மற்றினில் - (இந்த மண், வானம் அல்லாத)
பாதாளத்திலும்; எண்ணி நோக்குறின் - (இவளுக்கு ஒப்பாவார் யாரென்று)
கருதிப் பார்க்குமிடத்து; யாவரும் நேர்கிலா - ஒருவரும் ஒப்புமை
ஆகமாட்டாத; பெண்ணின் நோக்கு உடையாள் - பெண்ணழகு முழுவதும்
உடையவள்; என் கண்ணின் நோக்கி - என் கண்களால் பார்த்து;
உரைப்ப அருங்காட்சியாள் - வாயால் எடுத்துச் சொல்லமுடியாத அரிய
தோற்றமுடையவள். சீதையின் அழகு மிகுதியும், எவ்வளவு காணினும் முற்றும் காண
முடியாத கட்டழகின் மிகுதியும், அவ் விரண்டும் வாயினால் எடுத்துச்
சொல்லமுடியாத தன்மையும் ஈற்றடியில் புலப்படும். நோக்கு: அழகு - 'நோயிகந்து நோக்கு விளங்க' - (மதுரைக்: 13)
மற்றினில்: இடைச்சொல் உருபேற்று வந்தது. 6 | 2881. | 'கண்டு, "நோக்க அருங்
காரிகையாள்தனைக்
கொண்டு போனவன், இலங்கையர்
கோக்கு" எனா,
விண்டு மேல் எழுந்தேனை
வெகுண்டு, அவர்
துண்டம் ஆக்கினர், மூக்கு'
எனச் சொல்லினாள். |
கண்டு - (இத் தன்மையுடைய அழகிய பெண்ணைப்) பார்த்து;
நோக்கு அருங் காரிகையாள்தனை - காணவியலாத அழகுடைய
இப்பெண்ணை; இலங்கையர் கோக்கு - இலங்கையில் வாழும் அரக்கர்க்கு
அரசனான இராவணனுக்காக; கொண்டு போவன் எனா விண்டு -
(இவளை) எடுத்துக் கொண்டு போவேன் என்று சொல்லி; மேல்
எழுந்தேனை - அவள் மேல் பாயக் கிளம்பிய என்னை; அவர்
வெகுண்டு - அந்த இராமலக்குவர்கள் சினந்து; மூக்குத் துண்டம்
ஆக்கினர் - என் மூக்கையறுத்தார்கள்; எனச் சொல்லினாள் - என்று
கூறினாள். இராவணன் பொருட்டு அந்தக் கட்டழகியைக் கொண்டு
போவேனென்று அவள் மேல் பாய்ந்த பொழுது அவர்கள் வெகுண்டு என்
மூக்கை அறுத்தார்கள் என்கிறாள். மேல் விழுதல் - மிகப் பரபரப்போடு
முயலுதல் காரிகை - அழகு; 'கழல் யாப்பு காரிகை நீர்த்து' (குறள் 777)
மூக்கு என்றது, அறுபட்ட மற்ற உறுப்புக்களுக்கும் உபலட்சணமாம். 7 |