தூளியின் படலை - தூசியின் தொகுதி; வந்து தொடர்வு உற -
முன்னே வந்து படியவும்; மரமும் தூறும் - (அக் காட்டிலிருந்த)
மரங்களும் புதர்களும்; தாள்இடை ஒடியும் ஓசை - வரும் அரக்க
வீரர்களின் கால்களில் அகப்பட்டு ஒடிவதால் உண்டாகிய ஓசை; 'சடசட'
ஒலிப்ப - சடசடவென்று ஒலிக்கவும்; கானத்து ஆளியும் - காட்டிலுள்ள
யாளிகளும்; அரியும் - சிங்கங்களும்; அஞ்சி இரிதரும் - பயந்து
நிலைகெட்டு ஓடுகின்ற; அமலை நோக்கி - பேராரவாரத்தைப் பார்த்து;
மீளி மொய்ம்பினரும் - வலிய தோள்களையுடைய இராமலக்குவரும்;
சேனை மேல் வந்தது உளது என்று உன்னா - அரக்கர் சேனை
தம்மோடு போருக்கு வந்துள்ளது என்று எண்ணி..

     உன்னா என்னும் செயவென் எச்சம் அடுத்த செய்யுளிலுள்ள
மொழியலுற்றான் என்ற வினை கொண்டு முடியும். படலை - கூட்டம்,
தொகுதி; அமலை - பேரொலி. சடசட - ஒலிக்குறிப்பு.

     தூளியின் தொகுதியும், சடசட ஒலியும், ஆளியும் சிங்கமும்
அஞ்சியோடும் ஆரவாரமும் நோக்கி மீளி மொய்ம்பினரான
இராமலக்குவரும் அரக்கர் சேனை போர் செய்ய வந்துள்ளது என்று
எண்ணினர் என்பது.                                           59

இலக்குவனைத் தடுத்து இராமன் போருக்கு எழுதல்

    மின் நின்ற சிலையன் - மின்னல் போன்று ஒளி பொருந்திய
வில்லைத் தாங்கியவனும்; வீரக் கவசத்தன் - அழியாத வலிமை வாய்ந்த
கவசத்தையுடையவனும்; விசித்த வாளன் - (இடையில்) கட்டிய
உடைவாளையுடையவனும்; பொன் நின்ற - அழகு பொருந்திய; வடிம்பின்
வாளிப் புட்டிலன் - நுனியுள்ள அம்புகளைக் கொண்ட அம்பறாத்
தூணியையுடையவனும்; புகையும் நெஞ்சன் - கோபத் தீ மூண்ட
மனமுடையவனுமாய் (இராமனை நோக்கி); 'நில் - (போர் தொடங்காது) நில்;
நின்று - (அப்படி) நின்று; யான் செய் நிலை - நான் செய்யக் கூடிய
போரின் திறமையை; 'காண்டி' என - காண்பாய் என்று சொல்லி; விரும்பி-
(போர் செய்ய) விருப்பங் கொண்டு; நேரா - போருக்கு ஆயத்தமாகி;
முன் நின்ற - (தனக்கு) முன்னே வந்து நின்ற; பின் வந்தோனை - (தன்)