பக்கம் எண் :

கரன் வதைப் படலம் 291

     மூங்கிலில் பிறந்த தீ அந்த மூங்கில் தொகுதிகளையெல்லாம்
எரித்தழிப்பது போல அரக்கர் குலத்திலே பிறந்த சூர்ப்பணகை அந்த
அரக்கர் குலத்தையெல்லாம் பூண்டோடு அழிப்பதற்கு மூல காரணமாக
இருந்தமையால் அவளை மூங்கிலிலிருந்து தோன்றும் நெருப்புக்கு உவமை
கூறினார் சுட்டினாள் : முற்றெச்சம்.                         66

கரன் இராமனுடன் தானே பொருவேன் எனல்

2941. கண்டனன், கனகத் தேர்மேல்,
     கதிரவன் கலங்கி நீங்க,
விண்டனன் நின்ற, வென்றிக்
     கரன் எனும் விலங்கல் தோளான்;
'மண்டு அமர் யானே செய்து, இம்
     மானிடன் வலியை நீக்கி,
கொண்டனென் வாகை' என்று,
     படைஞரைக் குறித்துச் சொன்னான்.

    கதிரவன் கலங்கி நீங்க - பல ஆயிரம் கதிர்களையுடைய சூரியனும்
கலக்கமுற்று நீங்கும்படி; கனகத் தேர்மேல் - பொன் மயமான தேரின்
மேல்; விண்டனன் நின்ற - பகைத்து நின்ற; வென்றிக் கரன் எனும் -
வெற்றியையுடைய கரன் என்கிற; விலங்கல் தோளான் - மலைகள்
போன்ற தோள்களையுடைய அரக்க வீரன்; கண்டனன் - (இராமபிரானைக்)
கண்டு; படைஞரைக் குறித்து - தன் படை வீரர்களை நோக்கி; 'யானே
மண்டு அமர் செய்து -
நான் ஒருவனே இந்தப் பெரிய போரைச் செய்து;
இம் மானிடன் வலியை நீக்கி - இந்த மனிதனது ஆற்றலை அழித்து;
வாகை கொண்டனென்' - வெற்றிமாலையைச் சூடுவேன்; என்று
சொன்னான் -
என்று கூறினான்.

     தனிப்பட இராமன் ஒருவனே போர் செய்ய எதிரே நிற்பதால் அது
கண்ட கரன் 'இவனை வெல்வதற்குத் துணையாக எனக்குச் சேனையோ
துணைப் படையோ வேண்டா; நானே வெல்வேன்' என்று எளிதாகக்
கூறினான் என்பது.

     விரைவும் தெளிவும் பற்றிக் கொண்டனன் இறந்த காலத்தால்
கூறினான்;  காலவழுவமைதி. விண்டனன் கண்டனன் - முற்றெச்சங்கள்.
விண் : இடவாகுபெயர். விலங்கல் : மலை - தொழிற்பெயர். விலங்கல்
தோள் : மலை போல வலிமையும் பெருமையும் கொண்டமையால்.      67

2942.' "மானிடன் ஒருவன்; வந்த வலி
     கெழு சேனைக்கு, அம்மா!