பக்கம் எண் :

கரன் வதைப் படலம் 309

திரண்ட மணற்குன்றுகளையுடையவை; வீரக் கரி - வலிய யானைகளாகிய;
முதலைக் குலம் - முதலைகளின் கூட்டம்; மிதக்கின்றன - மிதக்கப்
பெற்றவையும்; பாரம் குடர் - கனத்த குடல்களாகிய; மிடை பாசடை -
நெருங்கிய பசுமையான தாமரையிலைகள்; படர்கின்றன - மேலே படரப்
பெற்றவையுமாகிய; மூரித் திரை உதிரம் குளம் பல - பெரிய
அலைகளையுடைய இரத்தக் குளங்கள் பல; கழுது முழுகி எழ - பேய்கள்
முழுகி நீராடி எழுமாறு; உதிக்கும் - உண்டாயின.

     பெரிய இரத்த வெள்ளத்தைப் பேய்கள் நீராடியெழுவதற்கு இடமான
தாமரைப் பொய்கைகளென்று உருவகப்படுத்தி, அவற்றிற்குக் குடல்களைத்
தாமரையிலைகளாகவும், ஈரல்களைத் தாமரை மலர்களாகவும் தேர்களை
மணற் குன்றுகளாகவும், யானைகளை முதலைகளாகவும் குறித்து
வருணித்தார். முற்றுவமையணி.                                  94

2969. அழைத்தார் சிலர், அயர்த்தார் சிலர்,
     அழிந்தார் சிலர், கழிந்தார்;
உழைத்தார் சிலர், உயிர்த்தார் சிலர்,
     உருண்டார் சிலர், புரண்டார்;
குழைத் தாழ் திரைக் குருதிக் கடல்
     குளித்தார் சிலர், கொலை வாய்
மழைத் தாரைகள் படப் பாரிடை
     மடிந்தார் சிலர், உடைந்தார்.

    கொலை வாய் மழைத் தாரைகள் பட - (பகைவரைக்) கொல்லும்
தன்மையுடைய கூரிய நுனியுள்ள (இராமனுடைய) அம்புகளாகிய மழைத்
தாரைகள் மேல் விழுவதனால்; சிலர் அழைத்தார் - (அரக்கர்களில்) சில
பேர் (துன்பம் பொறுக்க மாட்டாமல் ஐயா அப்பா என்று)
கூவியழைத்தார்கள்; சிலர் அயர்த்தார் - சிலர் சோர்ந்து தளர்ந்தார்கள்;
சிலர் அழிந்தார் - சிலர் இறந்தொழிந்தார்கள்; (சிலர்) கழிந்தார் -சிலர்
நெடுந்தொலைவு விலகிச் சென்றார்கள்; சிலர் உழைத்தார் - சிலர் மிக
வருந்தினார்கள்; சிலர் உயிர்த்தார் - சிலர் பெருமூச்சு விட்டனர்; சிலர்
உருண்டார் -
சிலர் (தரையிலே) உருண்டார்கள்; (சிலர்) புரண்டார் - சிலர்
(தரையிலே) புரண்டு தத்தளித்தனர்; சிலர் குழை தாழ் - சிலர் சேறு
ஆழ்ந்து; திரைக் குருதிக் கடல் குளித்தார் - அலைகளோடு கூடிய
இரத்தக் கடலில் மூழ்கினார்கள்; சிலர் பார் இடை மடிந்தார் - சிலர்
தரையிலே விழுந்து இறந்தார்கள்; (சிலர்) உடைந்தார் - சிலர் உறுதிநிலை
கெட்டு ஓடினார்கள்.

     அரக்க வீரர் பலரும் இராமனுடைய அம்புகளால் பலபடி,
ஆயினமையை இச் செய்யுள் புலப்படுத்தும். 'கொலைவாய்' என்ற
அடைமொழியால் 'மழை' அம்புமழையாயிற்று.