| 3043. | கடுங் கரன் எனப் பெயர்
படைத்த கழல் வீரன்,
அடங்கலும் அரக்கர்
அழிவுற்றிட, அழன்றான்;
ஒடுங்கல் இல் நிணக் குருதி
ஓதம்அதில் உள்ளான்
நெடுங் கடலில் மந்தரம் என,
தமியன் நின்றான். |
கடுங் கரன் எனப் பெயர் படைத்த - கொடிய கரன் என்று பேர்
பெற்ற; கழல் வீரன் - வீரக் கழல் பூண்ட வீரன்; அரக்கர் அடங்கலும்
அழிவு உற்றிட - அரக்கரெல்லோரும் (போரில்) அழிவடைய; அழன்றான்
- சினங் கொண்டான்; ஒடுங்கல் இல் - குறைவில்லாத; நிணக் குருதி
ஓதம் அதில் - கொழுப்போடு கூடிய இரத்த வெள்ளத்தினிடையே;
உள்ளான் - உள்ளவனான கரன்; நெடுங் கடலில் மந்தரம் என - பெரிய
கடலினிடையே மந்தர மலை போல; தமியன் நின்றான் - தனித்தவனாக
நின்றான். அரக்கர் எல்லோரும் போரில் அழிவெய்திட, நிணக் குருதி
வெள்ளத்தில் நிற்கும் கரன் பாற்கடலைக் கடையும்பொழுது, அதனிடையில்
நின்ற மந்தர மலை என்னும் மத்துப் போன்றவன் என்றார். 169 இராமன்முன் கரன் எதிர்ப்படல் | 3044. | செங் கண் எரி சிந்த, வரி
வில் பகழி சிந்த,
பொங்கு குருதிப் புணரியுள்,
புகையும் நெஞ்சன்-
கங்கமொடு காகம் மிடைய,
கடலின் ஓடும்
வங்கம் எனல் ஆயது ஒரு
தேரின்மிசை-வந்தான். |
புகையும் நெஞ்சன் - சினத்தீ மூளும் மனமுடைய அந்தக் கரன்;
செங்கண் எரி சிந்த - சிவந்த கண்கள் நெருப்புப் பொறியைச் சொரியவும்;
வரிவில் பகழி சிந்த - கட்டமைந்த வில் அம்புகளைப் பொழியவும்;
பொங்கு குருதிப் புணரியுள் - மேலே பொங்கியெழுகின்ற இரத்தக்
கடலிலே; கங்கமொடு காகம் மிடைய - கழுகுகளும் காக்கைகளும்
நெருங்க; கடலில் ஓடும் வங்கம் எனல் ஆயது - கடலிலே விரைந்து
செல்லும் கப்பலென்று உவமை சொல்லுமாறு; ஒரு தேரின் மிசை வந்தான்-
ஒரு தேரின் மேல் வந்தான். |