தீ உருவ - நெருப்புப் போன்ற வடிவையுடையனவும்; கால் விசைய-
காற்றைப் போல வேகம் உள்ளனவும்; செவ்வியன - பிற இலக்கணங்கள்
எல்லாம் அமைந்தவையுமான; வெவ் வாய் வடிக்கணை ஆயிரம் -
கொடிய வாயையும் கூர்மையுமுடைய ஆயிரம் அம்புகளை ஏவி; அரக்கர்
பதி எய்தான் - அரக்கர் தலைவனான கரன் இராமன் மேல் தொடுத்தான்;
தீ உருவ, கால் விசைய செவ்வியன - அவ்வாறே நெருப்புப் போன்ற
வடிவுடையனவும் காற்றுப் போல வேகமுள்ளவையும் சிறப்புடையனவும்;
வெவ் வாய் - கொடிய நுனிகளையுடையனவுமான; ஆயிரம் வடிக்கணை
- ஆயிரம் கூரிய அம்புகளைத் தூண்டி; இராமனும் அறுத்தான் -
இராமபிரானும் துணித்தான். கரன் வரும் போதே ஆயிரம் அம்புகளை எய்ய இராமபிரானும்
அத்தகைய கணைகளால் அவற்றையறுத்தான் என்பது. கரன் கணை
செலுத்தியதையும் இராமன் அவற்றைத் துணித்ததையும் ஒரே தொடர்களால்
குறித்தது. போர் உத்தியில் சமநிலை காட்டப் போலும். 172 | 3047. | ஊழி எரியின் கொடிய
பாய் பகழி ஒன்பான்,
ஏழ் உலகினுக்கும் ஒரு
நாயகனும், எய்தான்;
சூழ் சுடர் வடிக் கணை
அவற்று எதிர் தொடுத்தே,
ஆழி வரி விற்
கரனும், அன்னவை அறுத்தான். |
ஏழ் உலகினுக்கும் ஒரு நாயகனும் - ஏழு வகையான
உலகங்களுக்கெல்லாம் ஒப்பற்ற நாயகனான இராமபிரானும்; ஊழி எரியின்
கொடிய - ஊழிக் காலத்து உலகையழிக்க வல்ல நெருப்பைக் காட்டிலும்
கொடுமையுடையனவாய்; பாய் பகழி ஒன்பான் - பாய்ந்து செல்லும்
ஒன்பது பாணங்களை; எய்தான் - (கரன்மேல்) தொடுத்தான்; ஆழி
வரிவிற் கரனும் - வட்டமாக வளைந்த வில்லையுடைய கரன் என்னும்
அரக்கனும்; சுடர் சூழ் வடிக் கணை - ஒளி பரவும் கூரிய (ஒன்பது)
அம்புகளை; அவற்று எதிர் தொடுத்து - அந்தக் கணைகளுக்கு எதிராகச்
செலுத்தி; அன்னவை அறுத்தான் - அந்த அம்புகளைத் துணித்தான்; ஏ -
அசை. ஏழுலகினுக்கு ஒரு நாயகன் - கீழேழு, மேலேழு ஆகிய பதினான்கு
உலகங்களுக்கும் தலைவனாகிய இராமபிரான். 'செம்மாண் தனிக்கோல்
உலகேழினும் செல்ல நின்றான்' (168) எனத் தயரதன் சிறப்பிக்கப்
பெற்றமையால் அவனுக்குப் பின் அவன் மைந்தனான இராமபிரானுக்கும்
அவ்வுரிமையுடைமை காரணமாகவும் கூறப் பெற்றது எனலாம். 173 |