வயங்கு எரிக் கடவுளும் - விளங்குகின்ற அக்கினி தேவனும்; நயம்
கிளர் நானநெய் அளாவி - நலம் மிக்க நறுமண நெய்யை (அகலில்)
சொரிந்து; வியன் கருப்பூரம் - சிறந்த கற்பூரத்தை; மென் பஞ்சின்
மீக்கொளீஇ - மெல்லிய பஞ்சுத் திரியின் மேல் வைத்துப் பற்றும் படி
செய்து; கயங்களில் - குளங்களில்; மரைமலர்க் காடு பூத்தென - சிவந்த
தாமரைப் பூக்கள் பூத்தாற் போல; நந்தலில் விளக்கம் மாட்ட -
அணைதலில்லாத விளக்குகளை ஏற்றவும்....(ஏ - அசை).

     இராவணனுக்கு அங்கியங் கடவுள் விளக்கேற்றும் பணி செய்தமை
கூறப்பட்டது.18

    நல் புதிது அலர் கற்பகத் தருவும் - சிறந்த புத்தம் புது
மலர்களைக் கொண்ட கற்பக மரங்களும்; பொய் இலாக் கதிர் நெடு
மணிகளும் - தவறுதல் இல்லாத ஒளி உமிழும் பெரிய (சிந்தாமணி
போன்ற) தேவரத்தினங்களும்; கறவை ஆன்களும் - பால் சுரக்கும்
(காமதேனு போன்ற) பசுக்களும்; நிதிகளும் - தேவருலகில் உள்ள
(சங்கநிதி பதுமநிதி போன்ற) பெரு நிதிக் குவியல்களும்; அதிசயம்
அளிப்பதற்கு - (இராவணனுக்கு) வியப்பை அளிக்கும் முறையில்; அருள்
அறிந்து - (அவன்) அன்பு காட்டும் நேரமறிந்து; முறை முறை நின்று
நீட்ட - வரிசை வரிசையாய் நின்று தம் பரிசுகளை வழங்கவும் .. (ஏ -
அசை).

     இராவணன் அருள் காட்டுவார்க்கு இத்தேவர் உலகச் செல்வங்கள்
அவ்வப்போது பரிசுகள் பொழிந்தன எனவும் கூறலாம். கற்பகத் தரு -
சந்தானம், மந்தாரம், பாரிசாதம், கற்பகம், அரிசந்தனம் என ஜந்து;
தேவமணிகள் - சிந்தாமணி, சூளாமணி; பசுக்கள் காமதேனுவும் அதன்