நடந்ததுபற்றிச் சூர்ப்பணகை கூறல் அறுசீர் ஆசிரிய விருத்தம் | 3129. | அற்று அவன் உரைத்தலோடும், அழுது
இழி அருவிக் கண்ணள்,
எற்றிய வயிற்றள், பாரினிடை
விழுந்து ஏங்குகின்றாள்,
'சுற்றமும் தொலைந்தது, ஐய!
நொய்து' என, சுமந்து கையள்,
உற்றது தெரியும்வண்ணம்,
ஒருவகை உரைக்கலுற்றாள்: |
அற்று அவன் உரைத்தலோடும் - அவ்வாறு (இராவணன்) கூறிய
மாத்திரத்தில்; அழுது இழி அருவிக் கண்ணள் - அழுவதால் வழியும்
அருவி போன்ற கண்ணீரை உடையவளாய் (சூர்ப்பணகை) ; எற்றிய
வயிற்றள் - (கைகளால்) அடிக்கப்படும் வயிற்றை உடையவளாய்;
பாரினிடை விழுந்து ஏங்குகின்றாள் - நிலத்தின் மேல் விழுந்து புரண்டு
அழுகின்றவளாய்; 'ஐய - ஐயனே; சுற்றமும் நொய்து தொலைந்தது -
(காவல் நின்ற) உறவும் விரைவில் அழிந்து போனது; எனச் சுமந்த கையள்-
எனத் தலை மீது கையை வைத்தவாறு; உற்றது தெரியும் வண்ணம் -
(கரன் முதலியோருக்கு) நேர்ந்த அழிவின் வரலாறு விளங்கும்படியாக; ஒரு
வகை உரைக்கலுற்றாள் - ஒருவாறு தொகுத்துக் கூறலாயினாள். 63 | 3130. | ' "சொல்" என்று என் வாயில் கேட்டார்;
தொடர்ந்து எழு சேனையோடும்
"கல்" என்ற ஒலியில் சென்றார்,
கரன் முதல் காளை வீரர்;
எல் ஒன்று கமலச் செங் கண் இராமன்
என்று இசைத்த ஏந்தல்
வில் ஒன்றில், கடிகை மூன்றில்,
ஏறினர் விண்ணில்' என்றாள். |
கரன் முதல் காளை வீரர் - கரன் முதலிய இளங்காளைகளான
வீரர்கள்; சொல் என்று என் வாயில் கேட்டார் - நேர்ந்தது சொல் என்று
என் வாய்மொழியைக் கேட்ட உடனே; தொடர்ந்து எழு சேனையோடும்-
இடைவிடாது வரும் படைகளோடும்; கல்லென்ற ஒலியில் சென்றார் -
கல்லென்ற பேரொலி முழங்கப் புறப்பட்டனர்; எல் ஒன்று கமலம் -
ஒளிக்கதிர் பட்டு விரிந்த தாமரை போலும்; செங்கண் இராமன் - சிவந்த
கண்களை உடைய இராமன்; என்று இசைத்த ஏந்தல் - எனப் பெயர்
பெற்ற தலைவனின்; வில் ஒன்றில் கடிகை மூன்றில் - புகழ் பெற்ற
வில்லால் |