என்ன, உரை அத்தனையும் - என்று மாரீசன் சொன்ன கூற்றுகள்
அனைத்தையும்; எத்தனையும் எண்ணிச் சொன்னவனை - சிறிதேனும்
எண்ணிப் பார்க்கும்படிக் கூறிய மாரீசனை; ஏசின - இகழ்ந்த; அரக்கர்பதி
சொன்னான் - அரக்கர் தலைவனாகிய இராவணன் கூறலானான்; 'அன்னை
உயிர் செற்றவனை - உன் தாய் தாடகையின் உயிரை அழித்தவனை;
அஞ்சி உறைகின்றாய் - எண்ணி அச்ச முற்று இன்னும்
உயிர்வாழ்கின்றாய்; உன்னை - (அப்படிப்பட்ட) உன்னை; ஒருவற்கு
ஒருவன் என்று - ஓர் ஆண்மையாளன் என்று; உணர்கை நன்றோ -
நினைப்பது பொருத்தமாகுமா? (ஆகாது என்றபடி).

     தாயைக் கொன்றவனைப் பழிக்குப் பழி வாங்காத நீயும் ஆண்
மகன்தானா என மாரீசனிடம் இராவணன் வினவினான். ஒருவற்கு ஒருவன் -
இணையான சிறப்புள்ள வீரன் என மதித்தல் எனப் பொருள் பட்டது.27

    'திக்கயம் ஒளிப்ப - திசை யானைகள் ஓடி ஒளிந்து கொள்ளவும்;
தேவர்நிலை கெட - தேவர் தங்கள் பெருமை அழியவும்; வானம் புக்கு -
விண்ணுலகை நண்ணி; அவர் இருக்கை புகைவித்து - அவர்களின் மாட
மாளிகைகளை நெருப்புக்கு இரையாக்கி; உலகம் யாவும் -
அனைத்துலகங்களிலும்; சக்கரம் நடத்தும் - ஆணைச் சக்கரம் செலுத்தும்;
எனையோ - (நிகரற்ற) என்னையோ; தயரதன் தன் மக்கள் நலிகிற்பர் -
தசரதன் புதல்வரான இராமலக்குவர் அழிக்க வல்லார்?; வலி இது நன்று
அன்றோ - இந்த ஆற்றலும் நன்று நன்று (என்றான்)

     ஏளனம் தோன்றும்படி தன் வலிமையோடு இராமலக்குவர் வலிமையை
ஒப்பிட்டுக் காட்டிப் பேசினான் இராவணன். நன்று நன்று என்ற அடுக்கு
ஏளனம் குறித்தது.                                            28