இவ்வாறு கூறினார். கொய்யா மலர் மலர் கொய்தது எனக் கவிதையழகு
மிளிர முரண் அணியுடன் கூறினார். மூன்றாம் வரியில் 'வய்தேவி' என
ஓசை எழுதலால் எதுகை பிழையாதாயிற்று.                        45

    உண்டாகிய கேடு உடையார் - நிச்சயம் அழிவு நேரும் என்ற
நிலையில் உள்ளார்; துயில்வாய் - உறக்கம் கொள்ளுகையில்; எண் தானும்
இயைந்து இயையா உருவம் - எண்ணத்தில் ஒரு போதும் இசைந்திராத
விசித்திர வடிவங்களை; கண்டார் எனலாம் வகை - கனவிற் கண்டார்கள்
என்று கூறத்தக்க முறையில்; பண்டு ஆரும் உறா இடர் - எக்காலத்தும்
முன்பு எவரும் படாத துயரம்; பாடு உறுவாள் - பட இருக்கின்றவளான
சீதை; கண்டனள் - மாய மானைக் கண்டாள்; (ஆல் - அசை)

     துன்பம் வருமுன் கனவு போன்ற முன் சகுனங்கள் தோன்றினாற்
போலச் சீதை முன் பொன்மான் விபரீதம் விளைவிக்கத் தோன்றியது.46

    அவ் இராவணன் வாழ்நாள் - அந்த இராவணனின் ஆயுட் காலம்;
மாளுதலால் - முடிய இருப்பதனாலும்; வீழ் நாளில் - அவன்
மரணமுறுகிற நாளில்; அறம் புவி மேவுதலால் - தருமம் பூமியில் செழிக்க
இருப்பதனாலும்; (சீதை); காணா - பொன்மானைக் கண்டு; 'இது கைதவம்'
என்று உணராள் - 'இது வஞ்சனை வேடம்' என்று உணராதவள் ஆனாள்;
பேணாத - ஆதரித்தற்கு ஒவ்வாத; நலம் கொடு பேணினள் - அழகில்
ஆர்வம் கொண்டு (மாயமானை) விரும்பி நின்றாள். (ஆல் - அசை)