சீதை மாயமானை விரும்பியதற்குக் காரணம் இராவணன் அழிவும்,
அறத்தின் புத்துயிர்ப்பும் ஒரு சேர நடைபெறும் காலம் நெருங்கியதால்
என்றார்.                                                  47

மானைக் கண்டு மயங்கிய சீதை இராமனை அடைதல்

    நெற்றிப் பிறையாள் முனம் - இளம் பிறை போலும் நெற்றியை
உடைய சீதை முன்; நின்றிடலும் - (மாய மான் வந்து) நிற்கவும்; முற்றிப்
பொழி காதலின் - (அவள்) நிறைந்த ஆசை ததும்பி நிற்க; 'பற்றித் தருக'
என்பென் - 'இம் மானைப் பிடித்துத் தரவேண்டும்' என்று இராமனைக்
கேட்பேன்; எனப் பதையா - என உணர்ச்சி மிக்கவளாய்; (சீதை);
வெற்றிச் சிலை வீரனை - வில்லால் வெற்றி கொள்ளும் வீரனாகிய
இராமனை; முந்துறுவாள்; மேவினள் - அடைந்தாள். (ஆல் - அசை)  48

    (இராமனிடம் சென்று சீதை); 'ஆணிப் பொனின் ஆகியது -
மாற்றுயர்ந்த பொன்னால் ஆனதும்; ஆய் கதிரால் சேணில் சுடர்கின்றது-
சிறந்த ஒளியினால் தொலைவிலும் பளபளக்கின்றதும்; திண்செவி கால் -
வலிய காதுகளும் கால்களும்; மாணிக்க மயத்து - சிவந்த
மாணிக்கங்களால் ஆகியதுமான; ஒரு மான் உளது - ஒரு மான் காட்சி
தருகின்றது; காணத் தகும் - அழகால் காண்பதற்கு இனிதானது; என்றனள்-
என்று கூறியவளாய்; கைதொழுவாள் - (அதனைப் பற்றி அளிக்க
வேண்டுமெனக் கருதி) கையால் வணங்கி நின்றாள்; ஆல் - அசை.