துன்பத்தை நீக்கி); வாருணம் நினைந்தனர் - வருண மந்திரத்தை
எண்ணினர்; வான நீர் உண்டு - (அதனால்) வானத்தில் இருந்து
கிடைத்த நீரைப் பருகி; விடிவு நோக்குவார் - பொழுது விடியும்
காலத்தை எதிர் நோக்கியவர்களாய்; தாரணி தாங்கிய - நிலத்தைத்
தாங்கிக் கொண்டுள்ள; கிரியில் தங்கினார் - ஒரு பெரிய மலையில்
தங்கி இருந்தார்கள்.

     இராமனும் தம்பியும் நீக்க முடியாத துன்பத்திலிருந்து
விடுபட்டவர்களாகி, வருண மந்திரம் சொல்லி அதனால் கிடைத்த
வான நீரைப் பருகிப் பொழுது விடியும் காலத்தை எதிர்நோக்கி ஒரு
பெரிய மலையில் தங்கி இருந்தனர். பேரஅரும் - நீக்குதற்கு அரிய.
அற - முழுமையாக. வாருணம் - வருண மந்திரம். அருந்துயர் -
பண்புத்தொகை, பேர்ந்துளோர் - வினையாலணையும் பெயர்.
நோக்குவார் - முற்றெச்சம். வானநீர் - ஐந்தாம் வேற்றுமை உருபும்
பயனும் உடன் தொக்க தொகை.                                93

    வீரன் - வீரனாகிய இராமன்; கல் அகல் வெள்ளிடை -
கற்கள் பரந்துள்ள வெளியிடத்தில்; கானின் நுண்மணல் - காட்டில்
உள்ள நொய்மையான மணல்; பல்லவம் - தளிர்கள்; மலர்கொடு -
(மற்றும்) மலர்கள் (ஆகியவை கொண்டு இலக்குவன்); படுத்த
பாயலின் - அமைத்த படுக்கையில்; எல்லை இல் துயரினோடு
இருந்து - அளவற்ற பெருந்துன்பத்தோடு இருந்து; மெல் அடி -
(தனது) மென்மையான பாதங்களை; இளையவன் வருட -
இளையவன் ஆகிய இலக்குவன் மெதுவாகத் தடவ; சாய்ந்தனன் -
பள்ளி கொண்டான். ஏ - ஈற்றசை.

     இராமன் வெட்ட வெளியில் மணல், தளிர்கள், மலர்கள்
ஆகியவற்றைக் கொண்டு இலக்குவன் அமைத்த படுக்கையில், அவன்
மெத்தெனத் திருவடி வருடப் பள்ளி கொண்டான். வெள்ளிடை -
மேல் மறைவில்லாத இடம், வெட்ட வெளி என்ப. பல்லவம் - தளிர்.
படுத்த - அமைத்த. பரமனுக்குப் பாகவதன் செய்யும் கைங்கர்யத்தை
ஈற்றடியால் கூறினார். இதில் உடன்பிறப்புப் பாசம் நிறைந்து
உள்ளமையையும் எண்ணுக. கொடு - இடைக்குறை. மெல் அடி -
பண்புத்தொகை.